Maska alverçilərinə yaşıl işıq: “Dövlət qurumu müdaxilə edə bilməz” - EKSPERT

Koronavirus epidemiyasının getdikcə daha geniş ərazidə, xüsusən də qonşu İranda yayılması ölkəmizdə tibbi ağız masakalarına tələbatı artıb.

Tələbin çox olduğunu görən “işbazlar” maskaların qiymətini süni şəkildə qaldırır və ya tələbi artırmaq üçün dövriyyədən çıxarırlar. Bəs görəsən belə olduğu halda dövlət qurumları həmin sahibkarlarla bağlı hansısa addım ata bilərmi?

Məsələ ilə bağlı 1news.az-a danışan Azad İstehlakçılar Birliyinin sədri Eyyub Hüseynov bildirib ki, bazar tələb və təklif aksiomu ilə işləyir.

“Tələb artanda qiymət qalxır və keyfiyyət aşağı düşür. Bu  gün mənə bir neçə yerdən zəng etdilər ki, tibbi maskalar tapılmır. Bunun qiymətinə və miqdarına heç bir dövlət qurumu nəzarət eləmir, bu iş biznes əsasında qurulub. Dövlət qurumunun bu məsələyə müdaxiləsi doğru deyil. Güman ki, burada alverçilər xüsusi rol oynayacaq, apteklər qiyməti qaldıracaq, çünki bunun qiyməti tənzimlənmir. Maska xəstələr üçündü, sağlam adamlar üçün deyil. Ondan xəstə olan adamlar istifadə edir ki, ətrafa virusları yaymasın”.

Ekspert bildirib ki, sahibklarlar tərəfindən maskaların dövriyyədən çıxarılması normaldır.

“Bu biznes qurumunun öz işidi, istəsə satar, istəsə də saxlayar. Dövlət elə iş aparmalıdır ki, istehlakçıların bütün mallara və xidmətlərə bərabər əlyetənliyi təmin olunsun. Dövlət bu halda addım ata bilər, həmin məhsulu vergilərdən azad etdikdə qiymətlər də normallaşa bilər. Dövlət vəzifəsi odur ki, bolluq yaratsın və gizlədənlər üzə çıxarsın. Ölkədə yerli istehsalı stimullaşdırmaq üçün addımlar atılmalıdır. Sahibkar maskanı istədiyi qiymətə sata bilər, satdığının vergisini verəcək. Buna heç bir dövlət qurumu müdaxilə edə bilməz”.

E.Hüseyhov onu da deyib ki,  maska istehsalı Azərbaycanda biznes fəaliyyəti kimi uğurlu olmadığına görə sahibklarlar üçün maraqlı deyil.

Qafar Ağayev