Gürcüstan parlamentinin qarşısında azərbaycanlılar aksiya keçirir – FOTO – VİDEO
Fevralın 8-də, Tbilisidə Gürcüstan parlamentinin qarşısında azərbaycanlılar dinc aksiya keçirib.
1news.az-ın verdiyi xəbərə görə, aksiya Gürcüstanda erməni terrorçu Mixail Avaqyana heykəl qoyulması ilə əlaqədardır.
“Borçalı irəli” ictimai birliyinin sədri Məhəbbət İmanov:
“Erməni separatçı Mixail Avaqyana Gürcüstanda heykəl qoyulması ilə bağlı etiraz edirik. O, Gürcüstanda hansı xidmətlər göstərib ki, ona burada heykəl ucaldılıb? Onun heykəlinin qoyulması ilə bağlı rayonun yerli icra qurumları tərəfindən icazə verilib. Bu, səhv qərardır, buna görə də büst götürülməlidir. Burada toplaşmağımızın məqsədi bu regionda təxribatçının heykəlinin götürülməsidir”.
“Borçalı iş adamları birliyi”ictimai birliyinin üzvü İsrafil Bayramov:
“Azərbaycan və Gürcüstanı uzun illərdir ki, dostluq münasibətləri birləşdirir. Əvvəlki hökumət bu münasibətə yüksək dəyər verirdisə, təəssüflər olsun ki, hazırki hökumət buna başqa cür yanaşır.
Deyirlər ki, xəbərimiz yox idi. Bu, mümkündür? Hesab edirik ki, yeni gürcü hökuməti ilə ermənilər arasında ticarət olub: biz sizə prezident seçkilərində səs verərik, siz də Avaqyana heykəl qoyun. Buna görə də indi hökumət susur. Digər incidiyimiz məqamda heykəlin açılışının 20 yanvarda olmasıdır. Bu, dostluğumuza vurulan zərbədir. Dostlar belə rəftar etmir”.
Xatırladaq ki, yanvarın 20-də Gürcüstanın Axalkalaki şəhərinin Buqaşen qəsəbəsində Azərbaycanın Dağlıq Qarabağ və ətraf rayonlarının hərbi işğalında və bu ərazilərdəki dinc azərbaycanlıların qətlində birbaşa iştirak edən separatçı, terrorist Mixail Avaqyana büstün qoyulub.
Açılışda Axalkalakinin meri Yurik Unanyan, millət vəkilləri Enzel Mkoyan və Samvel Manukyan da iştirak edib. Həmçinin Ermənistanı bu tədbirdə Ermənistanın Gürcüstandakı səfiri Ruben Sadoyan da təmsil edib.
Bununla bağlı Azərbaycanın Gürcüstandakı səfiri Dursun Həsənov Gürcüstan XİN-də görüş keçirərək büstün açılmasına etirazını bildirib. Eyni zamanda, Gürcüstanın Azərbaycandakı səfiri Zurab Pataradze Azərbaycan XİN-ə dəvət edilərək, iki ölkə arasında mövcud olan ikitərəfli strateji tərəfdaşlıq münasibətlərinin ruhuna cavab verməyən bu halın aradan qaldırılmasına dair təxirəsalınmaz tədbirlərin görülməsi tələb edilib.
Arxadan vurulan zərbə: Gürcüstan separatçıları dəstəkləyir?
XİN Gürcüstana etirazını bildirib – Avaqyana görə
Tərcümə: S.Xankişiyeva