ŞƏT Azərbaycanda seçkiləri şəffaf və demokratik hesab etdi
“Azərbaycanda seçkilər uğurlu, qanuni, şəffaf və demokratik şəkildə keçirildi”.
1news.az-ın verdiyi xəbərə görə, bunu Azərbaycanda keçirilən növbədənkənar parlament seçkilərində Şanxay Əməkdaşlıq Təşkilatı (ŞƏT) nümayəndə heyətinə rəhbərlik edən təşkilatın baş katibinin müavini Şerali Conon deyib.
“Seçkilərdə xüsusi problem olmadı, seçki prosesinə təsir etməyən xırda pozuntular qeydə alındı. ŞƏT seçkilərin Azərbaycan qanunvericiliyinə uyğun və bütün beynəlxalq öhdəliklərin yerinə yetirilməsi ilə keçirildiyini düşünür”, - o bildirib.
Qeyd edәk ki, fevralın 9-da Azәrbaycanda növbәdәnkәnar parlament seçkilәri keçirilib. Seçkilərdə 1314 nəfər namizəd iştirak edib.
Səsvermə hüququna malik 5 212 902 nəfər seçicidən 2 547 982 seçici səs verib. Seçici fəallığı 47.81 faiz təşkil edib.
Ən aktiv seçki dairəsi 1 saylı Şərur-Sədərək Seçki Dairəsi olub ki, burada seçici fəallığı 76,1 faiz (37 min 970 seçicidən 29 419 nəfər), ən passiv dairə olan 17 saylı Yasamal 3-cü Seçki Dairəsində isə seçici fəallığı 17,84 faiz (30 min 534 seçicidən 5 min 447 nəfər) təşkil edib.
Seçkilərin gedişini 883 beynəlxalq və 77 790 yerli müşahidəçi izləyib. Yerli müşahidəçilərdən 35 152-i siyasi partiyaların müşahidəçiləri olub. Beynəlxalq müşahidəçilər 58 ölkəni və 59 təşkilatı təmsil edib.
S.Xankişiyeva