"Səudiyyə Ərəbistanı Qarabağ münaqişəsində Azərbaycanın ədalətli mövqeyini dəstəkləyir"
Bakıda Səudiyyə Ərəbistanının milli bayramı - Krallıq elan olunması günü münasibətilə rəsmi qəbul təşkil edilib.
1news.az xəbər verir ki, qəbulda hökümət rəsmiləri, millət vəkilləri, xarici ölkələrin Azərbaycandakı səfirləri, ictimaiyyət nümayəndələri iştirak ediblər.
Hər iki ölkənin dövlət himnləri səsləndirildikdən sonra çıxış edən müvəqqəti işlər vəkili Məmduh əl-Cəbru deyib ki, 1932-ci ildə ölkəni Səudiyə Ərəbistanı adı aıtında birləşdirən Əbdüləziz əs-Səud Krallığın inkişafının əsasını qoyub. Diplomat Səudiyyə Ərəbistanının ötən müddət ərzində keçdiyi inkişaf yolundan, əldə etdiyi uğurlardan danışıb.
Səfir Səudiyyə Ərəbistanının beynəlxalq və regional miqyasda artan mövqeyinə də toxunub. O, Səudiyyə Ərəbistanı Krallığının İslam dünyasının birliyi, əməkdaşlığı yolunda daim çalışdığını vurğulayıb.
O, ölkəsinin Azərbaycan ilə əməkdaşlığa böyük önəm verdiyini, iki ölkə arasında əlaqələrin inkişafında mühüm mərhələnin baş verdiyini vurğulayıb. Ölkələrimiz arasındakı münasibətlərin daha da möhkəmlənəcəyinə əminliyini ifadə edib.
Dini Qurumlarla İş üzrə Dövlət Komitəsinin sədr Mübariz Qurbanlı Azərbaycan hökuməti adından Səudiyyə Ərəbistanı xalqını təbrik edib, sülh və əmin-amanlıq arzulayıb. O deyib ki, Azərbaycanla Səudiyyə Ərəbistanı arasında əlaqələr mehriban dostluq və tərəfdaşlıq prinsiplərinə əsaslanır. Azərbaycan Prezidenti İlham Əliyevin Səudiyyə Ərəbistanına səfərləri çərçivəsində dövlət başçılarımız arasında, eləcə də digər səviyyələrdə keçirilmiş çoxsaylı görüşlər həm ikitərəfli, həm də beynəlxalq təşkilatlar çərçivəsində əməkdaşlığımızın inkişafına təkan verib.
Səudiyyə Ərəbistanı həmişə Ermənistan-Azərbaycan Dağlıq Qarabağ münaqişəsində Azərbaycanın beynəlxalq hüquqa əsaslanan ədalətli mövqeyini dəstəkləyir, işğalçılıq siyasəti aparan Ermənistanla diplomatik əlaqələr qurmaqdan imtina edir. Ölkələrimiz arasında əlaqələr gələcəkdə daha da inkişaf edəcək.
P.Sultanova