Səfir: Portuqaliya Azərbaycanın strateji əhəmiyyətinin fərqindədir
Bakıda Portuqaliyanın Milli Günü münasibətilə rəsmi qəbul təşkil edilib.
1news.az xəbər verir ki, tədbirdə rəsmi şəxslər, xarici ölkələrin Azərbaycanda akkreditə olunmuş səfirləri,ictimaiyyət nümayəndələri iştirak ediblər.
Portuqaliyanın Azərbaycandakı qeyri-rezident səfiri (iqamətgahı Ankara) Paula Da Silva ölkəsinin Milli Gününü Azərbaycanda qeyd etməkdən məmnunluq hissi keçirdiyini deyib. O bildirib ki, portuqal xalqı Avropanın ən qədim xalqlarındandır. Portuqal dili 5 qitədə 300 milyon insan tərəfindən istifadə olunur, poeziya, innovasiya və elm dili hesab olunur.
Səfir son illərdə Portuqaliyanın ümumi daxili məhsulunun (ÜDM) 7 faiz artdığını deyib.
Azərbaycanla münasibətlərə toxunan xanım səfir vurğulayıb ki, iki ölkə arasında diplomatk əlaqələrin qurulmasından 26 il keçir. Hər iki ölkə multikultiralizm və müxtəlif mədəniyyətlərin qovuşduğu məkandır.
Onun sözlərinə görə, Azərbaycanla ticarət dövriyyəsinin artırılması istiqamətində görüləcək işlər hələ çoxdur.
“Bizim hökumətimiz Azərbaycanın strateji əhəmiyyətinin fərqindədir. Eyni zamanda Azərbycanın logistika müstəvisində əhəmiyyətini anlayırıq. Azərbaycan ilə Avropa İttifaqı arasında münasibətlərin dərinləşməsini alqışlayırıq", deyə xanım Silva əalvə edib.
Tədbirdə çıxış edən Azərbaycanın gənclər və idman naziri Azad Rəhimov Portuqaliya xalqını ölkə rəhbərliyi adından təbrik edib. Nazir bildirib ki, iki ölkə arasında siyasi əlaqələr yüksək səviyyədədir:
"Azərbaycan Portuqaliya ilə ikitərəfli əlaqələrin inkişafına yüksək önəm verir. Azərbaycan Portuqaliyanın ölkəmizin ərazi bütövlüyünü və Dağlıq Qarabağ münaqişəsinin həllində respublikamızın mövqeyini dəstəkləməsini yüksək qiymətləndirir. Son illər ölkələrimiz arasında turizm, mədəniyyət və ticarət sahələrində əməkdaşlıq genişlənir. Əminəm ki, əlaqələrimiz gələcəkdə daha da inkişaf edib güclənəcək".
Daha sonra Portuqaliyadan dəvət olunmuş musiqiçilərin konsert proqramı təqdim edilib.
P.Sultanova