Seçkilərlə bağlı hər şey burada: “Sechki - 2018” Müstəqil Media Mərkəzi
Məlum olduğu kimi, aprelin 11-nə təyin edilmiş Azərbaycan Respublikası Prezidentinin seçkiləri ilə əlaqədar Mərkəzi Seçki Komissiyasının “Sechki - 2018” Müstəqil Media Mərkəzi fəaliyyətə başlayıb.
Yüksək tələblərə cavab verən zəruri texniki avadanlıqlarla təchiz edilmiş Mərkəzin yaradılmasında başlıca məqsəd seçkiləri geniş, operativ və obyektiv işıqlandırmaq, eləcə də seçkilərdə şəffaflığın təmin edilməsi üçün yerli və beynəlxalq kütləvi informasiya vasitələrinin nümayəndələrinə seçkilərlə bağlı məlumat əldə etməkdə və operativ şəkildə ictimaiyyətə çatdırmaqda yardım göstərməkdir.
Burada media təmsilçiləri üçün kompüterlər, telefon və faks aparatları quraşdırılıb, həmçinin onlar pulsuz və fasiləsiz internetdən də istifadə edə bilərlər. Prezident seçkiləri dövründə 24 saat ərzində fəaliyyət göstərəcək Müstəqil Media Mərkəzi mətbuat konfransları keçirmək və bəyanatlar vermək üçün də açıqdır. Prezidentliyə qeydə alınmış namizədlər öz seçkiqabağı təşviqat materiallarını Mərkəzdə yerləşdirə bilərlər.
Mərkəzin www.sechki-2018.az internet səhifəsi də artıq Azərbaycan, rus və ingilis dillərində mütəmadi fəaliyyət göstərir. Bu səhifədə seçki prosesi ilə bağlı səlahiyyətli şəxslərin və ekspertlərin rəyləri, açıqlama və bəyanatları yerləşdirilir, həmçinin seçkilərlə bağlı foto və video görüntülər təqdim edilir.
“Qanunvericilik” bölməsində Azərbaycan Respublikasının Konstitusiyası, Seçki Məcəlləsi, seçki prosesi ilə bağlı qərarlar, təlimatlar və əsasnamələrlə tanış olmaq mümkündür.
“Namizədlər” bölməsində aprelin 11-də keçiriləcək prezident seçkilərində namizəd kimi iştirak edəcək şəxslərin siyahısı yerləşdirilib.
“Müşahidə” bölməsində seçkiləri müşahidə edəcək beynəlxalq və yerli təşkilatlar, qurumlar haqqında məlumatlar qeyd olunub.
Bundan başqa saytda “Seçkilər və media”, “Exit Poll” və “Multimedia” bölmələri də fəaliyyət göstərir.
Buradan birbaşa MSK-nın və “Seçkilər” İnformasiya Mərkəzinin saytlarına keçmək mümkündür.
Eyni zamanda səhifədən seçki prosesini onlayn izləyə və seçici siyahısı ilə tanış ola bilərsiniz.
“Seçki - 2018” Müstəqil Media Mərkəzinin əlaqə məlumatlarını təqdim edirik:
Tel.: (+99412) 565-50-31
Ünvan: “Hilton” hotelinin “ONYX” zalı
Email: [email protected]
1news.az
