“Real” PSJ-nin sevinməsinə imkan vermədi, “Liverpul” səfərdən darmadağınla dönür – VİDEO

Dünən axşam Çempionlar Liqasında 1/8 final mərhələsinin ilk oyunları çərçivəsində daha iki qarşılaşma keçirilib.

1news.az-ın məlumatına görə, günün ən çox maraqla gözlənilən görüşü Madriddə baş tutub. Belə ki, yerli “Real” klubu Fransa təmsilçisi PSJ-ni qonaq edib.

Turnirin son qalibi olmuş madridlilərlə Fransa çempionatının vahid lideri arasındakı oyun gözlənildiyi kimi maraqlı və gərgin mübarizə şəraitində keçib.

Görüşdə hesabı Fransa təmsilçisi açsa da, ilk hissənin sonunda hesabı bərabərləşdirən meydan sahibləri ikinci hissədə daha iki qol vuraraq yekunda 3:1 hesablı qələbə qazanıblar.

Günün digər matçı Portuqaliyada baş tutub. Belə ki, “Porto” klubu “Liverpul”la üz-üzə gəlib. Rəqibinin qapısından 5 cavabsız top keçirən İngiltərə təmsilçisi növbəti mərhələyə vəsiqəni böyük ölçüdə təmin edib.  

Çempionlar Liqası

1/8 final mərhələsi, ilk oyunlar

14 fevral

“Real” (Madrid, İspaniya) – PSJ (Fransa) - 3:1

Qollar: Ronaldo, 45 (pen.), 83; Marselo, 86 - Rabio, 33

Baş hakim: Canluka Rokki (İtaliya)

 “Porto” (Portuqaliya) – “Liverpul” (İngiltərə) - 0:5

Qollar: Mane, 25, 53, 85; Salah, 29; Firmino, 70

Baş hakim: Daniele Orsato (İtaliya)

1news.az