Polad Bülbüloğlu: Azərbaycan və çeçen xalqları arasında olan dostluğu pozmaq mümkün deyil – FOTO – VİDEO

Rusiyanın paytaxtı Moskvada Azərbaycan və Çeçen ağsaqqalları arasında görüş keçirilib.

1news.az xəbər verir ki, bu barədə jurnalist Fərid Əkbərov şəxsi Facebook səhifəsində məlumat verib.

Məlumata görə, “Prezident” otelində keçirilən görüşdə Azərbaycanın Rusiyadakı səfiri Polad Bülbüloğlu, Çeçen Respublikasının başçısı Ramzan Kadıronun köməkçisi Adam Delimxanov, Çeçen Respublikasının Moskvadakı daimi nümayəndəsi Taymazxanov Bekxan da iştirak ediblər.

Görüşdə çıxış edən P.Bülbüloğlu bildirib ki, Azərbaycanla Çeçenistan xalqları arasında olan dostluq və əməkdaşlıq əlaqələrinin ənənəvi və tarixi xarakter daşıdığını bildirib:

“Ölkələrimizin rəhbərlərinə dərin minnətdarlığımı bildirirəm. Dərhal vəziyyəti nəzarətə aldılar, lazımi göstərişlər verdilər. Prezident İlham Əliyevin köməkçisi isə növbəti gün siyasi bəyanatla çıxış etdi. Çünki Rusiya Federasiyası və Çeçenistan Respublikası ilə Azərbaycan arasında olan dostluq və əməkdaşlıq əlaqələri ənənəvi və tarixi xarakter daşıyır. Son illərdəki bir çox hadisələrlə bu öz təsdiqini tapıb. Dostluğumuzun tarixi sübut edir ki, bizim dostluğumuzu pozmaq çox çətindir”.

Səfirin sözlərinə görə, üçüncü güclər var ki, ölkələrimiz arasında dostluğu pozmağa səy göstərirlər:

“Lakin yenə demək istəyirəm ki, bu, mümkün deyil. Biz buna qarşı mübarizə aparacağıq. Və bu mübarizə bizim rəhbərlərimizin, Azərbaycan və çeçen xalqlarının sınanmış iradəsi, dostluğu üzərində dayanır.

Onlar tək Moskvada deyil, bütün Rusiyada vəziyyəti gərginləşdirməyə çalışdılar. Konsulluqlarımızın, regionlarda yerləşən diaspor rəhbərlərimizin operativliyi və həyata keçirdikləri tədbirlər sayəsində buna imkan verilmədi və təxribatın inkişafının qarşısı alındı. Gələcəkdə də onlara bu cür imkan verməyəcəyik. Bunu edənlər və etməyə təhrik edənlər cəzalandırılmalıdırlar”.

1news.az