Paşinyan BMT-də danışıqlar prosesini məhv edir: Qarabağ Azərbaycanın tərkibində ola bilməz
Ermənistanın baş naziri Nikol Paşinyan Dağlıq Qarabağ münaqişəsinin nizamlanması üzrə aparılan danışıqlar prosesini pozmağa yönəldilmiş daha bir addım atıb.
1news.az erməni mətbuatına istinadla xəbər verir ki, Paşinyan BMT Baş Assambleyasının 73-cü sessiyasında çıxışı zamanı yenə də populizmə, aqressiyaya üstünlük verərək, bununla da sülh yolu ilə tənzimlənmənin tərəfdarı olmadığını bir daha nümayiş etirib.
Paşinyan bildirib ki, Dağlıq Qarabağ Azərbaycanın tərkibində ola bilməz. O, Dağlıq Qarabağ münaqişəsinin nizamlanmasının Ermənistanın xarici siyasətinin prioritetlərindən olduğunu deyib. Əlavə edib ki, qondrma “DQR”in statusu və təhlükəsizliyi Ermənistanın danışıqlar prosesindəki müstəsna prioriteti olacaq.
Sülh danışıqlarına zərbə vuran bu açıqlamasının ardınca isə Paşinyan bildirib ki, münaqişəni hərbi yolla həll etmək üçün hər hansı bir cəhd regionun təhlükəsizliyi, demokratiya və insan hüquqları üçün birbaşa təhlükədir: “Ermənistan münaqişənin ATƏT-in Minsk qrupu formatında həlli prosesində konstruktiv şəkildə iştirak etməyə davam edəcək. Bu, münaqişənin həlli üçün yeganə beynəlxalq səviyyədə tanınmış mandatı olan formatdır”.
O, münqişənin müharibə deyil, sülh, qarşılıqlı kompromis yolu ilə həll edilməli olduğunu vurğulayıb. Paşinyan Azərbaycanın Qarabağdakı separatçı relimlə dialoqa başlamalı olduğuna dair sərsəm bəyanatını da təkrarlayıb.
Xatırladaq ki, Paşinyan bu gün Nyu-Yorkda keçiriləcək Azərbaycan və Ermənistan XİN rəhbərlərinin görüşü ərəfəsində sülh prosesini pozacaq belə bir açıqlama ilə çıxış edib. Rəsmi Yerevanın danışıqlar prosesini pozmağa yönəldilmiş başqa bir addımı isə Azərbaycanın işğal edilmiş ərazilərində hərbi təlimlərin keçirilməsidir.
Bununla bağlı Azərbaycan XİN də bəyanat yayıb. Bəyanatda deyilir ki, kütləvi informasiya vasitələrinin yaydığı məlumatına əsasən, Azərbaycanın Ermənistan tərəfindən işğal olunmuş ərazilərində sentyabrın 25-28-də hərbi aviasiyanın iştirakı ilə hərbi təlimlər keçiriləcək. Ermənistan silahlı qüvvələrinin Azərbaycanın işğal olunmuş ərazilərində növbəti təxribatçı addımı vəziyyətin daha da gərginləşməsinə və ağır fəsadlara yol aça bilər.
XİN-in açıqlamasında deyilir ki, Azərbaycan və Ermənistan xarici işlər nazirlərinin ATƏT-in Minsk qrupunun həmsədrlərinin vasitəçiliyi ilə sentyabrın 26-da Nyu-Yorkda planlaşdırılan görüşü ərəfəsində Ermənistanın atdığı bu addım həmsədrlərin fəaliyyətinə və ümumiyyətlə, münaqişənin həlli üzrə danışıqlar prosesinə xələl gətirmək məqsədini güdür. Bir daha xatırladırıq ki, cəbhə bölgəsində vəziyyətin gərginləşməsinə görə bütün məsuliyyət tam şəkildə Ermənistan rəhbərliyinin üzərinə düşür.
P.Sultanova
