Olimpiya çempionu etiraf etdi: Məni 15 yaşımda zorlayıblar – FOTO

Məşhur Olimpiya çempionu Tatyana Qutsu şok etirafla diqqət mərkəzinə düşüb.

1news.az-ın Rusiya mətbuatına istinadən verdiyi xəbərə görə, SSRİ yığmasının heyətində 2 dəfə olimpiya, 1 dəfə dünya və 3 dəfə Avropa çempionu titulunu qazanmış idmançı zorlandığını etiraf edib.

Bununla bağlı şəxsi Facebook səhifəsində məlumat verən məşhur idmançı onu zorlayan şəxsin adını da açıqlayıb.

1992-ci ildən sonra gimnastika üzrə Ukrayna yığmasının şərəfini qoruyan 41 yaşlı Qutsu Yay Olimpiya Oyunlarının 6 qat qızıl mükafatçısı Vitali Şerbo tərəfindən zorlandığını bildirib.

Ukraynalının sözlərinə görə, bu hadisə ilk dəfə Almaniyanın Ştutqart şəhərində baş verib:

“27 il susduqdan sonra cəsarətimi topladım. Yığmadakı komanda yoldaşım və ən yaxın rəfiqəm hesab etdiyim Tatyana Toporova, “çox sağ ol ki” mənə dəstək lazım olan vaxt bunu etmədin. Qadınların hüquqları üçün mübarizə aparmadın. Sən ordaydın, hər şeyi eşidirdin. Amma müdafiəm üçün qalxmadın. Rüstəm Şərifov sən də “sağ ol ki”, yaxşı dost olsan da, 15 yaşım olanda səsimə səs vermədin. 1991-ci ildə məni zorlayan Vitali Şerbo idi.

Uzun illər bu vəhşiliyə görə özümə qapanmışdım. Bilirəm ki, indi özünü müdafiə etməyə çalışacaqsan. Amma mənim sübutum sənin sözlərindən üstündü. Mən heç vaxt olmadığı qədər güclüyəm. Sən artıq məni sındıra bilməzsən. Bu mənim həyatımdı. Mən bunu yaşamışam və etiraf etməyə qorxanlara da dəstək olacam. Öz gücümə inanıb, başqalarına dəstək olmağa çalışacam”.

Məlumat üçün bildirək ki, Qutsu ilə Şerbo idman gimnastları kimi karyeralarına keçən əsrin 90-cı illərinin əvvəllərində başlayıblar. Qutsu milliyətcə ukraynalı, Şerbo isə belorusdur.

1992-ci il Barselonada keçirilən Olimpiya oyunlarına Şerbo 6, Qutsu isə 2 qızıl medal qazanıb. Oyunlardan sonra hər ikisi ABŞ-a köçsələr də, Ukrayna və Belorus komandalarında çıxışlarını davam etdiriblər. Hadisə baş verən zaman isə Qutsunun 15, Şerbonun isə 19 yaşı olub.

Onu da bildirək ki, onların hər ikisi hazırda ABŞ-da yaşayırlar və gimnastika məktəbinə rəhbərlik edirlər. 

Babək Cahandarov