“Neftçi” klubunun prezidenti istefa verdi

Uğursuzluq zolağından heç cür çıxa bilməyən Bakının “Neftçi” klubunda istefa baş verib.

1news.az-ın klubun rəsmi saytına istinadən məlumatına görə, klub prezidenti Orxan Hüseynzadə şəxsi istəyi ilə tutduğu vəzifədən istefa verib.

Onun şəxsi istəyi ilə tutduğu postdan ayrıldığı bildirilib. Belə ki, Hüseynzadə bu gün istefa ərizəsi ilə klubun təsisçisinə müraciət edib. Nəticədə prezidentin istefası qəbul olunub.

Klub rəhbərliyi Orxan Hüseynzadəyə gələcək fəaliyyətində uğurlar arzulayıb.

Qeyd edək ki, Orxan Hüseynzadə ötən il iyulun 6-da “Neftçi”nin prezidenti təyin olunub.

Bu arada, Orxan Hüseynzadənin istefasının təfərrüatları məlum olub. Apasport.az saytının əldə etdiyi məlumata görə, 42 yaşlı futbol funksionerinin paytaxt kubundan gedişini SOCAR istəyib.

Hüseynzadənin “ağ-qaralar”dakı işi klubun təsisçisini qane etməyib. Buna görə də, onun “Neftçi”dən uzaqlaşdırılmasına qərar verilib.

Hüseynzadəni bu postda əvəzləyəcək şəxs də artıq məlumdu. Belə ki, bu gün “Sumqayıt”ın prezidenti vəzifəsindən istefa verən Kamran Quliyev bundan sonra “Neftçi”də eyni işi görəcək.

Onun “gənclik şəhəri” təmsilçisindən ayrılması da məhz bununla bağlıdı.

1news.az