Müsəlman bloqer ABŞ-da aparıcıları üzr istəməyə məcbur etdi – VİDEO

Müsəlman moda bloqeri, yazar Hoda Katebi Çikaqo şəhərindən yayımlanan WGN News verilişinə qonaq olub.

1news.az-ın Milli.az-a istinadən verdiyi xəbərə görə, verilişin aparıcıları bloqerə İranın nüvə silahı ilə bağlı sual verib, onu tələyə salmaq istəyiblər. Lakin savadlı qonaq aparıcılara siyasət və tarix dərsi verib.

Aparıcı Potash müəllifi olduğu “Tehran Streetstyle” kitabı ilə bağlı sualları cavablayacağını düşünən Hoda Katebiyə anidən İran inqlabı və nüvə silahı barədə suallar ünvanlayıb:

“Gəlin bir az da nüvə silahından danışaq. Bəzi izləyicilərimiz söyləyir ki, biz İrana güvənə bilmərik. Siz bu barədə nə düşünürsünüz?”.

Hoda isə cavab olaraq Amerikanın xarici siyasətini qınayıb və bildirib ki, ölkədə belə vəziyyətin yaranmasına səbəb imperializmin qalıqlarının hökm sürməsidir.

“Siz bu sadə hekayələrin kökündəki məsələlərə, onların arxasında baş verən hadisələrə baxmalısınız. Bu ölkə (Amerika), sözün əsl mənasında, qaradərili qulların belində, yerli xalqların soyqırımı üzərində qurulub”.

Onun sözlərinə qadın aparıcı müdaxilə edib. Robin Baumgarten Hodanın amerikalı kimi danışmadığını söyləyib.

Hodanın canlı yayımda dediyi sözlər sosial şəbəkələrdə qalmaqala səbəb olub. Xüsusən, iranlılar onun çıxışını bəyəniblər.

Aparıcılar verilişdən sonra üzr istəmək məcburiyyətində qalıblar.

1news.az