Mübariz Əhmədoğlu: Türkmənistan Azərbaycanı TƏPH-in tikintisinə cəlb edə bilər
Aşqabad Türkmənistan-Əfqanıstan-Pakistan-Hindistan (TƏPH) qaz kəmərinin Əfqanıstan hissəsini tikməyə hazırlaşır. TƏPH kəmərinin tikintisinin yubadılması Türkmənistanın siyasi davranışının nəticəsidir. Bütün layihələrlə bağlı vəd verməyi xoşlayan Aşqabad reallaşma prosesini hədsiz çox yubadır.
1news.az xəbər verir ki, bunu Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu deyib
Onun sözlərinə görə, indiki halda yubanma iki ciddi təhlükə ilə rastlaşıb: "Birincisi, Əfqanıstan-Türkmənistan sərhədində təkcə talibançılar deyil, İŞİD də xeyli aktivləşib. Türkmənistanın Əfqanıstanda realaşdırdığı layihələrə "Taliban"ın münasibəti müsbət olsa da, İŞİD-in Türkmənistanla həmsərhəd regionlarına gəlməsinin qarşısını ala bilmir və ya almaq istəmir. Bu təhlükəni neytrallaşdırmaq məqsədilə prezident Q.Berdıməhəmmədov Rusiya prezidenti V.Putinə zəng edərək RF-i TƏPH layihəsində iştiraka dəvət etdi. Məhz İŞİD-çilərin aktivliyinə görə RF bu layihədə iştiraka maraq göstərmədi.
İkincisi, İranın Hindistana qaz kəməri çəkmək planlarıdır. Türkmənistan üçün işi riskli edən odur ki, Rusiya İranın Hindistana çəkdiyi qaz kəməri layihəsində ən əsas tərəfdaşdır. Hindistanın qaz bazarı böyükdür. Əgər Rusiya və İran Hindistan bazarına İran qazını daha tez çıxaracaqlarsa, bu bazarda onların daha üstün mövqeyini təmin edəcəkdir. Türkmənistan ya Hindistanın içərilərinə doğru daha bir neçə yüz kilometr qaz kəməri çəkməlidir, ya da qiymətdə güzəştə getməlidir".
Politoloq hesab edir ki, Türkmənistanın xarici siyasəti normal düşünülmüş siyasət olacaqsa, o, bu vəziyyətdən çıxa bilər: "Qazaxıstanın TƏPH–də marağı var. Digər variant Azərbaycanla əlaqəlidir. Azərbaycanın həm Əfqanıstan, həm də Pakistanla çox gözəl siyasi münasibətləri var. Hər iki ölkə Azərbaycanla iqtisadi əlaqələrə böyük ümidlə yanaşırlar. Azərbaycanla iqtisadi və kommunikasiya əlaqələri qurmaq üçün xeyli resurs cəlb ediblər. Türkmənistan TƏPH-in tikintisinə Azərbaycanı cəlb etmək məqsədilə danışıqlara başlasa, faydasını görər. Təbii ki, Türkmənistan Azərbaycana qarşı səmimi siyasət aparmalıdır. Xəzər dənizində ərazi iddiasını kəskinləşdirməkdən əl çəkməli, özünü Azərbaycanın və Türkiyənin düşməni elan etmiş Ermənistanla münasibətlərini emosionallıqdan çıxarıb real praqmatik məcraya yönəltməlidir".
1news.az
