Mübariz Əhmədoğlu: Paşinyanın oğlu Tonoyanın əlində girovdur
Ermənistanda baş verən proseslərdə müxtəlif duetlər özünü aydın şəkildə göstərir. Bəzən bir-birinə zidd görünsə də reallıqda müasir Ermənistanın idarəetmə strukturu demək olar ki, duetlərdən ibarətdir.
Belə duetlərdən biri Paşinyan-Tonoyan duetidir. Əslində bu dueti aşkara çıxaran N.Paşinyanın özü oldu. D.Tonoyan ABŞ-da olarkən “yeni ərazilər əldə etmək üçün yeni müharibələr” tezisini ortalığa qoydu və sonradan N.Paşinyan bunu aşkar şəkildə dəstəklədi. N.Paşinyanın fikrincə, əgər D.Tonoyan belə deməsəydi, fərqli desəydi o, onu işdən çıxarardı. ATƏT-in Minsk Qrupu həmsədrləri, o cümlədən Azərbaycan Respublikasının Prezidenti ilə təmasda isə Paşinyan tam tərs mövqedədir, dinc tənzimlənməni prioritet elan edir. Az keçmiş bəlli oldu ki, D.Tonoyanın ABŞ-da verdiyi bu bəyanatın arxasında daha çox ABŞ-dakı erməni icmasından pul toplamaq dayanır və o da bəlli oldu ki, N.Paşinyanın həyat yoldaşı Anna Akopyan ABŞ-a pul toplamağa gedəcək. Sonradan bəlli oldu ki, ABŞ-dakı erməni icması Anna Akopyana demək olar ki, pul vermədi, cəmi 1milyon dollar pul vəd verildi. Onun da 600 dolları proqram reallaşdıqdan sonra verilmədir. Yəni, Anna Akopyan 600 min dollar pul tapmalı, uşaq bağçaları ilə bağlı hansısa humanitar layihəni reallaşdırmalıdır. Sonra ABŞ-dakı fondlardan biri ona bu məbləğdə pulu verəcək. Toplanan 500 min dolların özü də kifayət qədər şübhə altındadır. Ən yaxşı halda Anna Akopyan ABŞ-dan 500 min dollar pul gətirdi və bu pulla Azərbaycan ərazisini işğal etmək mümkün deyil. Anna Akopyanın özünün müxtəlif “cib xərcləri” var.
Paşinyan-Tonoyan duetində maraqlı dinamika var. N.Paşinyanın reytinqi aşağı düşdükcə D.Tonoyanın hərbi nazir kimi siyasətə müdaxiləsi, qətiyyəti artır. Tonoyanın atdığı addımların səbəbi isə Baş nazirin oğlunun hərbi xidmətdə olmasıdır.
N.Paşinyanın oğlu Aşot Paşinyanın hərbi xidmətdə olması artıq kifayət qədər siyasiləşmiş məsələdir. Dağlıq Qarabağın içərisində “gəzmədiyi” hərbi hissə yoxdur. N.Paşinyan oğlunun Xankəndində (Stepanakert) qondarma qurumun Müdafiə Nazirliyinin binasında xidmət etməyə çalışırdı və buna da nail oldu. Buna da maneçilik törədən Levon Mnasakanyanı işdən də çıxardılar. Sonra bəlli oldu ki, ümumiyyətlə Aşot Dağlıq Qarabağda xidmət edə bilməz, Yerevana gətirdilər. İndi hal-hazırda o, Ermənistandakı hərbi hissələrin birində xidmətdədir və D.Tonoyan istənilən anda bu hərbi hissədə istədiyi vəziyyəti yarada bilər. Beləliklə Aşot Paşinyan Ermənistan ordusunda olan çoxsaylı qeyri-hərbi itkilərin sayını artıranlardan ola bilər. Məhz buna görə də D.Tonoyan yaranmış vəziyyətdən öz xeyrinə istifadə edir. Çalışacaq ki, Aşot Paşinyanın qalan 6 ay hərbi xidməti dövründə aprel komissiyası işini başa çatdırsın və gəldiyi nəticələr D. Tonoyanın maraqlarına ziddiyyət təşkil etməsin. Əks-təqdirdə Paşinyanın nəsli kəsiləcəkdir.
Mübariz Əhmədoğlu
Siyasi İnnovasiya və Texnologiyalar Mərkəzinin direktoru, politoloq
