Mübariz Əhmədoğlu: Paşinyan Təhlükəsizlik Şurasının iclasını Dağlıq Qarabağda keçirməklə onun Ermənistan tərəfindən idarə olunduğunu hüquqi cəhətdən sübut etdi
Ermənistanın bu vaxtadək beynəlxalq aləmdə ən böyük arqumenti Dağlıq Qarabağın, özünü müstəqil şəkildə idarə etməsi, seçkili institutlarının, formalaşmış iqtisadiyyatının və ordusunun olması idi.
Guya Qarabağda nə varsa onun özünə məxsusdur. Bu arqumentlə Avropa İnsan Hüquqları Məhkəməsində qaldırılmış bir çox iddialara cavab verib. Paşinyan özü də hakimiyyətdə olduğu qısa müddət ərzində dəfələrlə Dağlıq Qarabağın özünü müstəqil idarə etdiyini, Ermənistanın Dağlıq Qarabağa aidiyyətinin olmadığını bildirib. ATƏT-in Minsk Qrupu həmsədrlərinin Paşinyanı ifşaedici bəyanatından sonra o, emosional və tələsik addım ataraq kifayət qədər ciddi səhvə yol verdi. Ermənistan Respublikasının Təhlükəsizlik Şurasının iclasını Dağlıq Qarabağda keçirdi. Ermənistan Respublikasının Təhlükəsizlik Şurası konstitusion qurumdur.
Dağlıq Qarabağ və Azərbaycanın digər işğal olunmuş ərazilərində Ermənistan vətəndaşları hərbi xidmətdədir. Ermənistan vətəndaşları siyasi və iqtisadi fəaliyyətlə məşğuldurlar. Ermənistanın ayrı-ayrı nazirləri Dağlıq Qarabağ və Azərbaycanın digər işğal olunmuş ərazilərinə səfərlər edirlər. Amma bunların hamısına Ermənistan tərəfi müəyyən mənada dəlil tapa bilirdi və bu tapdığı dəlilləri də müəyyən qədər ermənipərəst hesab olunan Qərb siyasiləri, məhkəmələri ermənilərin dediyi kimi qəbul edirdi. Amma indi Ermənistan Respublikasının Təhlükəsizlik Şurasını Dağlıq Qarabağda keçirməsinə başqa ad vermək olmaz: Dağlıq Qarabağ Ermənistan tərəfindən idarə olunur.
Paşinyanın bu cəhdinə beynəlxalq aləmin, xüsusilə ATƏT-in Minsk Qrupu həmsədrlərinin reaksiya verməsi vacibdir. Çünki Paşinyan ATƏT-in Minsk Qrupunun vasitəçiliyi üçün problem yaradır.
Mübariz Əhmədoğlu
Siyasi İnnovasiya və Texnologiyalar Mərkəzinin direktoru, politoloq