1news.az

Mubariz Əhmədoğlu: Aprel hadisələri üzrə parlament komissiyası Tonoyanı mühakimə etmək gücündə deyil

21 İyun saat 09:54 ~ 2 dəqiqəlik oxu 216
Mubariz Əhmədoğlu: Aprel hadisələri üzrə parlament komissiyası Tonoyanı mühakimə etmək gücündə deyil

Nikol Paşinyan separatçı Dağlıq Qarabağdakı qondarma rəhbərliklə gərgin mübahisəsi fonunda 2016-cı ilin aprel hadisələrinə dair komissiya yaratdı.

Əksəriyyətin fikrincə, bu komissiya separatçı Dağlıq Qarabağın qondarma rəhbərliyini cəzalandırmaq məqsədini daşıyır. Bu komissiyaya ən ciddi etiraz edən Ermənistanın Müdafiə naziri D.Tonoyan oldu. Onun fikrincə, bu komissiya Azərbaycanın apardığı informasiya müharibəsi nəticəsində yaranıb və komissiyanın nəticələri Azərbaycanın informasiya müharibəsindəki mövqeyini daha da gücləndirəcək. Tonoyanın narazı qalmasının səbəbi bəllidir. Çünki 2016-cı ildə aprel döyüşləri onun “Statik müdafiədən aktiv cilovlamaya” konsepsiyasından başlandı. Tonoyan ABŞ-da olarkən “yeni ərazilər üçün yeni müharibələr” konsepsiyasını irəli sürdü. Həm “Statik müdafiədən aktiv cilovlamaya”  konsepsiyasının, həm də “yeni ərazilər üçün yeni müharibələr” tezisinin Rusiyadan kənarda, Qərb məkanında formalaşdırılması və ortalığa qoyulması diqqəti çəkir. Ehtimal ki, Serj Sərkisyanı devirmək üçün məhz hərbi təxribat lazım idi; 2015-ci ildən bəri S.Sərkisyan Qərbə razılıq versə də, Qərbin  planlarını reallaşdıra bilmirdi.

Görünür, “yeni ərazilər üçün yeni müharibə” tezisini ABŞ-da gündəliyə gətirməklə D.Tonoyan ABŞ-ın N.Paşinyandan məyus olduğunu nümayiş etdirmək istəyir. Başqa sözlə, artıq Qərb N.Paşinyana inanmır və hesab edir ki, onun üzərində təzyiq olmalıdır.  Bu təzyiq özünü doğrulda  bilməyəcəksə hakimiyyətdən getməlidir. Ona görə əsas hədəf N.Paşinyandır. Artıq hiss olunur ki, N.Paşinyanın aprel komissiyasını yaradarkən indiki mövqeyi ilk mövqeyindən fərqlidir; S.Sərkisyanın aprel döyüşlərinə görə Müdafiə Nazirliyindən  uzaqlaşdırdığı hərbçiləri indi vəzifəyə qaytarır. N.Paşinyanın S.Sərkisyanı da istintaqa cəlb etməsi mümkün deyil, çünki D.Tonoyanın S.Sərkisyana münasibəti çox müsbətdir. Faktiki Tonoyanın Müdafiə naziri müavini vəzifəsindən azad etdi, Fövqəladə Hallar naziri təyin etdi. İndi də  Fövqəladə Hallar naziri dövründə baş vermiş korrupsiya halları ilə bağlı məlumatlar aşkarlansa da bu işdə heç bir dinamika yoxdur.

Beləliklə aprel komissiyasının D.Tonoyanı istintaqa cəlb etməsi, N.Paşinyanın Müdafiə nazirini hər hansı bir yolla cəzalandırması qeyri-mümkündür. Əksinə Qərbin dəstəyinə malik Müdafiə naziri D.Tonoyan özünün mövqeyini möhkəmləndirmək üçün yeni addımlar atır. Onun “Ermənistanda kimsə hakimiyyəti devirməyə cəhd etsə, qarşısında ordunu görəcəkdir” bəyanatı diqqətdən kənarda qalmamalıdır. Aprel komissiyasının müzakirələri və yaxud qərarı D.Tonoyanın xoşuna gəlməyəcəksə hərbçilər aprel komissiyasının üzvlərini həbs edəcəklər Beləliklə Ermənistanda geri sayım başlanıb. N.Paşinyan D.Tonoyanı sıradan çıxara bilməyəcək. O, aprel komissiyasını yaratmaqla öz taleyini D.Tonoyanın əlinə verdi.

Mübariz Əhmədoğlu,

Siyasi İnnovasiya və Texnologiyalar Mərkəzinin sədri, politoloq

OXUCULARIN SEÇİMİ
REDAKSİYANIN SEÇİMİ
Siyasət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2019 "The First News" İnformasiya Agentliyi,,
Bütün hüquqlar qorunur
entonee.net