Moskvada tanınmış blogger azərbaycanlılar və çeçenlər arasında baş vermiş dava üzrə saxlanılıb – FOTO – VİDEO
Dağıstandan olan tanınmış blogger Əlibəy Mirzəxanov Moskvada azərbaycanlılar və çeçenlər arasında baş vermiş dava üzrə saxlanılıb.
Rus mətbuatının yaydığı məlumata görə, fevralın 16-da Mirzəxanov hüquq-mühafizə orqanları tərəfindən saxlanılaraq bölməyə aparılıb.
Blogger bağlı qapılar arxasında aparılan istintaqı birbaşa efir vasitəsilə sosial şəbəkədəki hesabına yerləşdirib. Lakin bir qədər sonra canlı yayım kəsilib. Mizrəxanovun yaxınlarının sözünə görə, onun bu cinayətə heç bir əlaqəsi yoxdur.
Gün ərzində Mirzəxanovdan heç bir xəbər almaq mümkün olmayıb. Fevraln 16-da axşam blogger əlaqə yaradaraq bildirib ki, polis bölməsindədir və fevralın 18-də məhkəməyə çıxarılacaq.
Əlibəy Mirzəxanov son zamanlar Moskvada yaşayır və işləyir hicamla (İslam təbabətinə uyğun qan çıxarılması) məşğuldur və Instagram-da 90 min nəfərlik səhifədə bloggerdir.
Saxlanılmadan öncə Mirzəxanov yayımladığı video-müraciətdə bildirib ki, son zamanlar naməlum şəxslər tərəfindən izlənilir, lakin qanunazidd heç bir əməl törətməyib, eləcə də üzərində qadağan olunmuş əşya gəzdirmir.
Onun dostunun söylədiklərinə görə, Mirzəxanov radikal İslamın tərəfdarı deyil və gəncləri radikal fikirlərdən çəkindirir.
2012 və 2013-cü illərdə Mirzəxanov hüquq-mühafizə təşkilatları və mətbuata Dağıstanda oğurlanması və işgəncələrə məruz qalması ilə bağlı müraciət edib.
View this post on Instagram
Xatırladaq ki, fevralın 14-də Moskvada “Neolit” kafesinin yanında silahlı münaqişə baş verib. Hadisə yerinə gələn polis dava iştirakçılarından 18 nəfəri tutub.
Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Moskvadakı “Neolit” kafesində azərbaycanlılar və çeçenlər arasında baş vermiş insidentlə bağlı bildirib ki, Azərbaycan hökuməti insidenti adi məişət zəminində baş vermiş kriminal hadisə kimi dəyərləndirir və hesab edir ki, belə hallar Azərbaycan və çeçen xalqları arasında tarixən mövcud olan dostluq və qardaşlıq əlaqələrinə xələl gətirə bilməz.
Prezidentin köməkçisi deyib:
“Azərbaycan və çeçen xalqları arasında əlaqələr tarixin sınağından çıxmışdır və nümunəvi xarakter daşıyır. Prezident İlham Əliyevlə Çeçenistan Prezidenti Ramzan Kadırov arasında mövcud olan şəxsi dostluq münasibətləri, ötən ilin sonlarında keçirdikləri görüşdə səslənən fikirlər buna əyani sübutdur. Ümumiyyətlə, azərbaycanlılar bütün Qafqaz xalqları ilə əsrlər ərzində formalaşmış ortaq tarixini, dəyərlərini yüksək qiymətləndirir və həmişə qorumağa çalışır”.
Azərbaycan ilə Rusiya arasında gündən-günə inkişaf edən əməkdaşlıq əlaqələrinin həm də ölkəmizin Şimali Qafqaz respublikaları, o cümlədən Çeçenistanla əməkdaşlığının möhkəmlənməsində önəmli rol oynadığını vurğulayan Əli Həsənov deyib:
“Rusiya çoxmillətli dövlətdir, burada yaşayan xalqlar öz dillərini, mədəniyyətlərini qoruyub inkişaf etdirirlər. Rusiyada yaşayan azərbaycanlılar da digər xalqlar kimi həmişə öz milli mədəni hüquqlarından tam istifadə edə bilirlər. Biz soydaşlarımızı, qardaş çeçen və Rusiyada yaşayan digər xalqların nümayəndələrini bu ölkədəki multikultural mühitdən, yaradılmış şəraitdən xoş məramlar, xalqlararası dostluğun inkişafına töhfə verəcək məqsədlər üçün istifadə etməyə, belə xoşagəlməz insidentlərə yol verməməyə dəvət edirik. Əminliklə bildiririk ki, Moskvada yaşanmış insidentdən sui-istifadə edərək xalqlarımız arasında düşmənçilik toxumu səpmək istəyən qüvvələr böyük yanlışlığa yol verirlər və öz çirkin niyyətlərinə çatmayacaqlar”.
Öz növbəsində Çeçenistanın mətbuat və informasiya naziri Cambulat Umarov bildirib ki, hər hansı bir cinayət hadisəsini, xuliqanlığı sosial şəbəkələrdə hansı formada şərh edilməsindən asılı olmayaraq yaymaq istəyənlər çeçen və Azərbaycan xalqlarının əlaqələrini, dostluq və qardaşlıq münasibətlərini poza bilməz. Bu, qeyri mümkündür. Bu əlaqələr yüzilliklərə söykənir:
“Qardaş Azərbaycan xalqını salamlayıram. Böyük qürurla qeyd etmək istəyirəm ki, çeçen xalqı beynəlxalq terrorçuların yaratdığı fitnəni, çeçenlərin həlak olduğu zaman Azərbaycanın bizə açdığı isti qardaşlıq qucağını heç vaxt unutmayacaq. Moskva və başqa yerlərdə kriminal hadisələr baş verən zaman onların məqsədi mənəvi inkişafın, mədəniyyətin nümayişi deyil. Onların məqsədi pul qazanmaq hərisliyi, insanları cinayətkarlığa sövq etməkdir.
Çeçen və Azərbaycan xalqları böyük sivilizasiyanın, böyük mədəniyyətin davamçılarıdır. Bu zənginlik atadan oğula, oğuldan nəvəyə ötürülə-ötürülə indiki möhkəm qardaşlıq və dostluq əlaqələrinə çevrilib. Hər hansı bir cinayət hadisəsini, xuliqanlığı sosial şəbəkələrdə hansı formada şərh edilməsindən asılı olmayaraq yaymaq istəyənlər çeçen və Azərbaycan xalqlarının əlaqələrini, dostluq və qardaşlıq münasibətlərini poza bilməz. Bu, qeyri mümkündür. Bu əlaqələr yüzilliklərə söykənir.
Biz ulu öndər Heydər Əliyevin və böyük Əhməd Hacı Kadırovun davamçılarıyıq. Biz düşmənçilik kimi bir ayıb əmələ yol verə bilmərik. Biz müasir, mədəni xalqlarıq. Qeydə alınan xırda narazılıqları münaqişələrlə deyil, atalarımızın bizə miras qoyduğu kimi çay süfrəsi arxasında həll etmişik. Mən azərbaycanlıları və çeçenləri müqəddəs “Qurani-Kərim”də deyildiyi kimi, məyus olmamağa çağırıram. Bu narazılığın yeganə çıxış yolu qardaşcasına görüşmək, bir-birini anlamaq və hörmət etməkdir. Bu, bizim əcdadlarımızdan qalan bir mirasdır. Azərbaycan və Çeçenistan respublikalarına sülh arzulayıram”.
Bununla yanaşı, Moskvada azərbaycanlı və çeçen icmaları təxribatın qarşısını almaq üçün lazımi addımlar atıblar. Hər iki icmanın nümayəndələri toplaşaraq iki xalq arasında qardaşlıq əlaqələrinin yüksək səviyyədə olduğunu vurğulayıb, baş vemiş hadisəni təxribat kimi qiymətləndirəriblər. İnformasiya Təşəbbüsü Mərkəzinin rəhbəri, jurnalsit Fuad Abbasov görüşlə bağlı videonu Facebook-da paylaşıb.
Tərcümə: S.Xankişiyeva
