Meqrabyan: Rusiya hərbi bazasının statusu XXI əsrin yanaşmalarına uyğun gəlmir

Rusiyanın 102-ci hərbi bazasının qarşısında baş tutan etiraz aksiyası  Ermənistan-Rusiya münasibətləri, eyni zamanda hərbi sferada baxılmasına ehtiyac olan müqavilə-hüquq bazası üçün çox vacib və ciddi siqnal idi.

1news.az erməni mərbuatına istinadla xəbər verir ki, bunu erməni politoloq Ruben Meqrabyan deyib.

Onun sözlərinə görə, bu, sadəcə olaraq gözlənilməz nəticələrə gətirib çıxara bilən institusional məsuliyyətsizlikdir.

Xatırladaq ki, 12 yanvarda Gümrüdəki 102-ci Rusiya hərbi bazasının qarşısında Avetisyan ailəsinin rus əsgəri tərəfindən qətlə yetirilməsinin 4-cü ildönümü və digər rus hərbçisinin öldürdüyü qadınla bağlı etiraz aksiyası keçirilib.

Aksiya Ermənistanın Avropa partiyası tərəfindən keçirilib.

İştirakçılar Rusiya hərbi bazasının Ermənistandan çıxarılmasını tələb ediblər.

Meqrabyanın sözlərinə görə, Rusiya hərbi bazasının statusu XXI əsrin yanaşmalarına uyğun gəlmir. Bu, müstəmləkəçi dövrlərə daha xarakterikdir və hər bir halda yenidən nəzərdən keçirilməlidir.

"Ümumiyyətlə, Ermənistan öz xarici siyasət konsepsiyasına, müdafiə və təhlükəsizlik siyasəti məsələlərinə yenidən baxmalıdır. Rusiya hərbi bazası məsələsinə də həmçinin. Fakt budur ki, artıq belə şəkildə davam etmək mümkün deyil”, Meqrabyan qeyd edib.

P.Sultanova