Marta Qalindo: Azərbaycan-Kolumbiya münasibətlərində nailiyyətlər əldə olunub
Bakıda Kolumbiyanın Milli Günü münasibətilə rəsmi qəbul təşkil edilib.
1news.az xəbər verir ki, tədbirdə hökumət rəsmiləri, səfirlər, ictimaiyyət nümayəndələri iştirak ediblər.
Kolumbiyanın Azərbaycandakı müvəqqəti işlər vəkili Marta Qalindo çıxışında bu il ölkəsinin müstəqilliyinin 208 ili tamam olduğunu xatırladıb. Xanım diplomat ötən müddət ərzində ölkəsinin keçdiyi inkişaf yolundan söz açıb.
Bildirib ki, son 2 ildə Azərbaycan-Kolumbiya münasibətlərində nailiyyətlərin əldə olunub: “Kolumbiya və Azərbaycanın kənd təsərrüfatı sahələrini inkişaf etdirmək və əlaqələri möhkəmləndirmək naminə olan birgə marağı sayəsində, həmçinin özəl sektorların birgə apardığı işin bəhrəsi olaraq artıq Kolumbiyada bolluq rəmzi olan narın yetişdirilməsinə başlanılıb. “Red Valley” Azərbaycan şirkətinin Kolumbiyaya bəxş etdiyi 1200 nar ağacı ölkəmizin Kauka Cayl vadisində yetişdirilməkdədir. Eyni qayda üzrə Zaqatalanın fındıqlarının da Kolumbiyaya aparılması üçün işlər görülür.
Bundan başqa, neft-qaz, yüksək texnologiyalı nəqliyyat və s. kimi sahələrdə müasir dünyada özünü sübut edən Azərbaycanla bu sektorda uzunmüddətli investisiyaların əldə edilməsi üçün danışıqlar aparılır".
Xanım Qalindo deyib ki, 2016-cı ildən bu yana böyük ümidlərlə başlanan birgə addımlar artıq son illərdə öz nəticələrini verərək daha da sürətlənib: “Bu il Azərbaycan dövlət qulluqçularına ispan dili tədrisinin 6-cı versiyasını keçirəcəyik. Ümid edirəm ki, ticarətdə əlaqələrin şaxələndirilməsi məqsədilə Qafqaz regionuna yad olan dadların, yeni tropik meyvələrin gətirilməsi üçün həyata keçirilən layihələr də qısa zamanda öz bəhrəsini verəcək. Azərbaycanla mədəniyyət və incəsənət sahəsində də əməkdaşlığa başlamaq üçün Kolumbiyanın dünyaca məşhur rəssamı Fernando Boteronun əsərlərinin gətirilməsi üçün Heydər Əliyev Fondu ilə birgə çalışırıq".
Daha sonra çıxış edən Xarici İşlər Nazirliyinin xüsusi tapşırıqlar üzrə səfiri Azər Hüseyn Azərbaycan hökuməti adından Kolumbiya xalqını və dövlətini təbrik edib.
A.Hüseynin sözlərinə görə, əlaqələr ötən illər ərzində daim inkişaf edib, möhkəmlənib,m siyasi-mədəni dialoq yaranıb, iqtisadi, turizm, kənd təsərrüfatı kimi sahələrdə əlaqələrin inkişafı üçün yeni imkanlar ortaya çıxıb.
Səfir deyib ki, Dağlıq Qarabağ münaqişəsinə dair Kolumbiya Konqresi tərəfindən qətnamələrin qəbulunu Azərbaycan yüksək qiymətləndirir: “Azərbaycan Mərkəzi və Latın Amerikası ölkələri ilə əməkdaşlığa xüsusi diqqət yetirir. Əminəm ki, münasibətlərimiz daha da inkişaf etdirilərək, xalqlarımızın mənafeyinə xidmət edəcək”.
P.Sultanova
