Koçaryan siyasətə qayıdır

Ermənistanın ikinci prezidenti Robert Koçaryan siyasətə qayıtdığını bəyan edib.

1news.az xəbər verir ki, bu barədə Koçaryan Yerkir Media kanalına müsahibəsində deyib.

“Hesab edin ki, mən qayıtdım, birmənalı olaraq”, Koçaryan vurğulayıb.

Hansı formatda, tək, yoxsa siyasi qüvvə yaradaraq siyasətə dönməyi planlaşdırmasına gəlincə, Koçaryan deyib: "Bu qayıdış fərqli formatlarda ola bilər. Amma siyasətə qayıtmaq məcburiyyətində qaldığımın səbəblər barədə danışa bilərəm".

Onun sözlərinə görə, ilk və ən vacib səbəb geosiyasi vəziyyətdir:

"Xəritəyə baxın, görün Ermənistanın hardadır və hansı ölkələrlə əhatə olunub.Türkiyənin Azərbaycanla olan münasibətlərinə, həll olunmamış Dağlıq Qarabağ münaqişəsinə baxın. Və bunların hamısını birlikdə əlaqələndirməyə çalışın. Bəs bizim Ermənistanda nə var?.

"Mənim fikrimcə, bütün bunları başa düşməyən, təcrübəsi olmayan bir hökumət var. O hökümət ki, anlamır ki, ordunu gözdən salmaq olmaz. Bu hökumət ordudan uzaqdır və başa düşmür ki, hazırkı vəziyyətdə yalnız güclü bir ordu bizim dövlətçiliyimizin təminatıdır və Ermənistanın bu qədər ağrılı şəkildə əldə etdiyi tarazlığı pozan addımlar atır. Mən bundan keçdim. Bu təhlükə məni siyasətə qayıtmağa təşviq edir".

Qeyd edək ki, 2008-ci ilin 1 mart hadisələrinə görə həbs edilmiş Koçaryan avqustun 13-də həbsdən azad edilib. 

P.Sultanova