Koçaryan Paşinyan barədə: Tez yanıb, yox olacaq kometadır

Ermənistanın ikinci prezidenti Robert Koçaryan siyasi proseslərə qoşulacağını bir daha bəyan edib.

1news.az xəbər verir ki, bu barədə o, Rusiyanın “Kommersant” qəzetinə müsahibəsində deyib.

Onun sözlərinə görə, bu, siyasi partiya, hərəkat, yaxud mümkündür ki, hər hansı digər siyasi partiya ilə fəal əməkdaşlıq da ola bilər.Lakin hələlik bu istiqamətdə müəyyənləşdirmə yoxdur.

Koçaryan deyib ki, ölkədə etiraz ab-havası olub, Paşinyan da bunu zamanında hiss edərək rəhbərliyi üzərinə götürdü, bu da hakimiyyətin dəyişməsinə gətirib çıxardı.

O, həmçinin qeyd edib ki, insanlar əvvəlki hakimiyyətlərdən yorulmuşdu: “Əks halda, bu qədər kütləvi hərəkat çətin ki, baş verərdi. Lakin bilirsiniz, hakimiyyətə populuzmlə də yiyələnmək olar – tarixdə bu kimi nümunələri göstərmək mümkündür. Belə situasiyalarda hakimiyyətə gəlmək asandır, eləcə də hakimiyyəti tərk etmək daha çətindir. Sən populizmlə gəlirsən, ancaq gedərkən fəxrlə, real nəticələrlə getmək lazımdır. Ötən dörd ay göstərdi ki, hələ bütün istiqamətlərdə mövcud olan problemlər üzrə akkumulyasiya gedir və bu da mənim siyasətə geri dönməyimə olan səbəblərdən biridir”.

Koçaryanın sözlərinə görə, hakimiyyətin nə qədər kompetent olmasını, hansı dəyərlərə söykəndiyini və sistemli iş apara bilməsini öyrənmək üçün, dörd aylıq müddət kifayətdir. Yeni hakimiyyət xaotikdir və iqtisadiyyatdan baş çıxara bilmir, eləcə də açıq fəaliyyət proqramı yoxdur: 

“Ola bilsin ki, o kifayət qədər liderliyə malikdir, ancaq onun populuzmə doğru can atması məndə ciddi narahatlıq doğurur. O, mənə Latın Amerikasının populuzmi stilində Uqo Çavesi xatırladır. Əgər analoji tərəfdən yaxınlaşarsaq, bu çox bənzərdir”.

Koçaryan onu da bildirib ki, “Paşinyan ola bilsin ki, tez yanıb, yox olacaq meteorit, ya da kometadır”.

1news.az