1news.az

Kim minir Qazaxın Dilbaz atını, o, alır toyların şal-xalatını...

6 Mart saat 17:45 ~ 2 dəqiqəlik oxu 243
Kim minir Qazaxın Dilbaz atını, o, alır toyların şal-xalatını...

“Kim minir Qazaxın Dilbaz atını, O, alır toyların şal-xalatını...”. Osman Sarıvəlli bu misraları təsadüfən yazmayıb. Dözümlüyü ilə fərqlənən Qazaxın məşhur Dilbaz atları idmanda, minikdə, yükdə və yüngül qoşquda istifadə olunur.

Ağstafada “Dilbaz” atcılıq təsərrüfatında bu cins atlar saxlanılır. AZƏRTAC-ın bölgə müxbiri xəbər verir ki, atcılıq təsərrüfatı yeni yaradılanda, yəni 1997-ci ildə burada 10 baş at var idisə, indi təmiz qanlı Dilbaz atlarının sayı 106 başa çatıb. Prezidentin 2015-ci il avqustun 21-də imzaladığı Sərəncamla Dilbaz atlarının inkişafına 1,5 milyon manat vəsait ayrılıb. Bundan sonra yeni tövlənin inşasına başlanılıb və yaxın zamanda müasir tipli kompleksin tikilib istifadəyə verilməsi nəzərdə tutulur.

Atlardan yeni balalar da alınır, təsərrüfatda 28 baş madyan bəslənir, keçən il onlardan 6 bala alınıb. Bu il isə 26 bala gözlənilir.

Ağstafa atçılıq təsərrüfatının direktoru Səlimxan Gülalıyev qeyd edib ki, dünyada mövcud 67 at cinsindən ikisi Azərbaycanda yetişdirilir. Bunlar Qarabağ və Dilbaz atlarıdır. Dilbaz atlarının nəslinin nümayəndələrindən 300 ildən çoxdur Qazax atının cinsləşməsində istifadə olunub və indi bu atlar onların adı ilə bağlıdır. Dilbaz atlarını digər atlardan fərqləndirən üstün cəhətlərdən biri də onların burun pərlərinin bir qədər geniş olmasıdır. Bunun nəticəsində bu cins atlar qaçarkən havanı yaxşı yara bilir.

Dilbaz atlarının güclü və cəld olması cıdırda da özünü göstərir. Bakı ippodromunda 1940-2000-ci illərdə keçirilən yarışlarda bu cins atlar daim yüksək yerlər tutublar. 1962-1990-cı illərdə Dilbaz atları ümumittifaq yarışlarında 39 dəfə iştirak edib və 8 dəfə birinci yerə layiq görülüb, 36 dəfə isə müxtəlif attestatlar alıb.

Təsərrüfat sahibi hesab edir ki, bölgədə atçılığın inkişaf etdirilməsi gələcəkdə bu ərazilərə turistlərin gəlməsində də böyük rol oynaya bilər.

Qeyd edək ki, Dilbaz atları bir gündə 130 kiloqram yüklə 45-55 kilometr yol qət edə bilir. Təsərrüfatda ilxı halında saxlanan bu atlar havalar isindikdən sonra Ceyrançöldə ayrılan otlaq sahədə bəslənir.

1news.az

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2018 "The First News" İnformasiya Agentliyi,,
Bütün hüquqlar qorunur
entonee.net