Kaliforniyada meşə yanğınları davam edir
ABŞ-ın Kaliforniya ştatında tüğyan edən ən güclü meşə yanğınları bir qədər də genişlənərək min kvadratkilometrdən çox əraziyə yayılıb.
Hələlik yanğının cəmi 35 faizinin qarşısını almaq mümkün olub. Bu barədə ştatın meşə sahələrinin qorunması və yanğından mühafizə idarəsi məlumat yayıb.
1news.az-ın RİA Novosti-yə istinadla verdiyi xəbərə görə, qurumun saytında yerləşdirilən informasiyaya əsasən, dekabrın 4-də Ventura dairəsində başlayan və “Tomas” adı verilən yanğın hazırda 1020 kvadratkilometr ərazini əhatə edir. Kaliforniyanın cənubunda üç iri yanğın ocağını isə söndürmək mümkün olub.
Ştatın müasir tarixinə ən güclü dördüncü yanğın hesab olunan “Tomas” yanğınsöndürənlərdən birinin həyatına son qoyub. Ümumilikdə, yanğınla mübarizəyə 8 min nəfər cəlb edilib.
Hökumətin təxmini hesablamalarına görə, “Tomas” ölkəyə 70 milyon dollar zərər vurub. Ventura və Santa-Barbara dairələrində mindən çox evə və tikiliyə ziyan dəyib, həmçinin 18 minədək bina təhlükə qarşısında qalıb. Təhlükəli ərazilərdən 94 min nəfərin təxliyə olunduğu bildirilir.
Meteoroloqlar yanğının sürətlə yayılmasına səbəb olan küləyin hazırda bir qədər səngiməsinə baxmayaraq, dekabrın 17-dən yenidən güclənəcəyini proqnozlaşdırırlar.
S.Xankişiyeva
