Hulusi Kılıç: Azərbaycan, Qarabağ uğrunda şəhid olmağa hazıram
Azərbaycan mənim ikinci vətənimdir. Qarabağ üçün şəhid olmağa hazıram.
1news.az-ın Milliyet-ə istinadla verdiyi xəbərə görə, bunu Türkiyənin Azərbaycandakı sabiq səfiri Hulusi Kılıç deyib.
Azərbaycanı Respublika günü münasibətilə təbrik edən sabiq səfir çıxışı zamanı Dağlıq Qarabağ münaqişəsinə də diqqət çəkib və deyib ki, Ermənistan-Türkiyə sərhədini Azərbaycana görə bağlayıblar:
“Dünyada ikinci belə bir ölkə yoxdur ki, digər dövlətə görə öz sərhədini bağlasın. Bu, Türkiyə və Azərbaycanın bir-birinə nə dərəcədə yaxın olmasının sübutudur”.
2008-2012-ci illərdə Türkiyənin Azərbaycandakı səfiri olmuş Kılıç həmişə Azərbaycanın maraqlarının müdafiəsində durmağa və Qarabağa görə canından keçməyə hazır olduğunu bildirib:
“Mən Azərbaycanda beş ilə yaxın səfir vəzifəsində çalışdım, Azərbaycanın dövlət ordeni ilə təltif olunan ilk xarici səfirəm. O baxımdan, mənim üçün Azərbaycan bir vətəndir, candır, mənim ikinci vətənimdir. Qarabağ üçün şəhid olmağa hazır olduğumu kameralar önündə söyləmişəm”.
Xatırladaq ki, 2012-ci ilin 13 sentyabr tarixində Azərbaycan Respublikasının Prezidenti İlham Əliyevin imzaladığı sərəncama əsasən, Hulusi Kılıç “Dostluq” ordeni ilə təltif edilib. Türk səfir Azərbaycan və Türkiyə arasında dövlətlərarsı əlaqələrin inkişafı və möhkəmlənməsi sahəsində xüsusi xidmətlərinə görə ən yüksək mükafata layiq görülüb.
S.Xankişiyeva