Hindistan səfiri Masallı və Biləsuvarda olub - FOTO
Hindistanın Azərbaycandakı səfiri Sanjay Rana Masallı rayonuna səfər edib və yeni tikilən Sənaye Məhəlləsində rayon İcra Hakimiyyətinin başçısı Rafil Hüseynovla görüşüb.
1news.az-a səfirlikdən verilən məlumata görə, Sənaye Məhəlləsində gəzinti zamanı səfir infrastrukturla təmin olunmuş sexlər, ofislər və bank, poçt, notarius, vergi və s. inzibati xidmətlər üçün ayrılmış yerlərlə tanış olub.
İcra Hakimiyyətinin başçısı R. Hüseynov ərazinin Azərbaycanın kiçik və orta sahibkarlarını öz layihələrini həyata keçirmək imkanı ilə təmin edəcəyini, onların ilk yeddi ildə gömrük rüsumlarından azad olunacağını və gəlir vergisinin yalnız yarısını ödəyəcəklərini bildirib.
O, Masallı Sənaye Məhəlləsinin müxtəlif sahələrdə, xüsusilə də mebel hazırlanması və mebel aksessuarlarının istehsalı kimi sahələrdə ixtisaslaşan sənaye kompleksi kimi inkişafına ümid bəslədiyini bildirib.
İcra Hakimiyyətinin başçısı Masallı rayonunda kənd təsərrüfatı sahəsində həyata keçirilən işlər, o cümlədən çəltikçilik və çiyələkçiliyin geniş miqyasda inkişafı barədə məlumat verib.
Səfir Rananın Biləsuvar rayonuna səfəri çərçivəsində İcra Hakimiyyətinin başçısı Mahir Quliyevlə keçirdiyi görüş zamanı Şimal-Cənub Nəqliyyat Dəhlizinin infrastrukturu və kənd təsərrüfatı sahəsində ikitərəfli əməkdaşlıq əlaqələri müzakirə olunub.
Daha sonra səfir Azərbaycanın Milli Qəhrəmanı Mübariz İbrahimovun adını daşıyan Biləsuvar lisey-məktəb kompleksi ilə tanış olub. Şagirdlər səfirə Azərbaycanın milli adət-ənənələri haqqında məlumat verib və mədəni proqram nümayiş etdiriblər.
Məktəbin direktoru Bəhruz Mehdiyev və məktəbin əməkdaşları Azərbaycanın Mərkəzi Bankı tərəfindən təsis olunmuş məktəbin yüksək təhsil standartlarına cavab verdiyini və şagirdlərin mükəmməl göstəricilər göstərdiklərini qeyd edib. Məktəb şagirdləri həmçinin, səfiri hind mədəni proqramları ilə salamladılar. Şagirdlərə uğurlar arzulayan səfir məktəbin kitabxanasına kitablar hədiyyə edib.
Səfər çərçivəsində diplomat Azərsun Holdinqin Biləsuvar rayonu yaxınlığındakı kənd təsərrüfatı sahələri və konserv zavodu ilə tanış olub və ikitərəfli mümkün biznes imkanları ilə bağlı fikir mübadiləsi aparıb.
P.Sultanova
