Hindistan parlamentinin nümayəndə heyəti Bakıda səfərdədir
Azərbaycan parlamentinin 100 illiyi münasibətilə Milli Məclisdə keçirilən təntənəli iclasda yüksək vəzifəli parlament üzvü K.H.Muniyappanın rəhbərlik etdiyi Hindistan nümayəndə heyəti iştirak edib.
Bu barədə 1news.az-a Hindistanın Bakıdakı səfirliyindən məlumat verilib.
Qeyd edilib ki, Hindistan parlamentinin hər iki palatasının üzvləri Çintamani Malviya və V.Vijayasai Reddynin daxil olduğu nümayəndə heyəti bu tarixi tədbirdə iştirak etmək üçün Azərbaycanda səfərdədirlər.
Nümayəndə heyəti Hindistan və Azərbaycan parlamentləri arasındakı əməkdaşlığı müzakirə etmək məqsədilə Milli Məclisin birinci vitse-spikeri Zifayət Əsgərovla görüş keçiriblər.
Onlar Milli Məclisdə Azərbaycan-Hindistan parlamentlərarası İşçi qrupunun üzvləri Rüfət Quliyev və Jalə Əliyeva ilə müzakirələr apararaq, Hindistan və Azərbaycan parlamentləri arasında daha geniş mübadilələrə arzularını ifadə ediblər.
Nümayəndə heyəti ikitərəfli əməkdaşlığı müzakirə etmək məqsədilə Hindistan-Azərbaycan hökumətlərarası komissiyanın həmsədri, ekologiya və təbii sərvətlər naziri Muxtar Babayevlə görüşəcəklər.
Qonaqlar Bakı şəhərinin tarixi və mədəni məkanları, o cümlədən əsrlər boyu Hindistan zəvvarlarının ziyarət etdiyi Atəşgahla tanış olublar.
P.Sultanova