1news.az

Hikmət Hacıyev: Ermənistanın ATƏT yanında daimi nümayəndəliyi öz səlahiyyətlərini pozur

6 Mart saat 13:56 ~ 4 dəqiqəlik oxu 586
Hikmət Hacıyev: Ermənistanın ATƏT yanında daimi nümayəndəliyi öz səlahiyyətlərini pozur

Ermənistan mətbuatı Sumqayıt hadisələri ilə bağlı növbəti uydurmaya əl atıb. Belə ki, erməni mediası Sumqayıt hadisələrinin 30-cu ildönümü ilə bağlı qondarma “Dağlıq Qarabağ Respublikası” adından ATƏT-də separatçı rejimin “parlamenti”nin qəbul etdiyi bəyanatın yayıldığını yazıb.

Məlumata görə, bəyanat martın 2-də separatçı rejimin “Xarici İşlər Nazirliyi”nin təşəbbüsü ilə yayılıb və  orada Sumqayıt hadisələri emənilərə qarşı “soyqırım” kimi təqdim edilib.

30 il əvvəl Sumqayıtda törədilmiş iştişaşlarla bağlı kifayət qədər ətraflı faktlar, məlumatlar var. Sumqayıtdakı hadisələrin təşkilatçılarının ermənilər olduğunu və iğtişaşın baş verməsində Sumqayıt əhalisi arasına yerləşdirilən, Azərbaycan dilini təmiz bilən ermənilərdən ibarət təxribatçı qrupların xüsusi rol oynadığı faktlarla sübut olunub.

1988-ci il fevralın 27-dən 28-nə keçən gecə Sumqayıt şəhərində baş vermiş iğtişaşlar nəticəsində 32 nəfər ölüb. Onlardan 26-sı erməni, 6-sı isə azərbaycanlı olub. Bu hadisələr SSRİ Dövlət Təhlükəsizlik Komitəsinin ermənilərin özləri ilə birgə təşkil etdiyi və həyata keçirdiyi ssenarinin tərkib hissəsi idi. Sumqayıtda bu hadisəni təşkil etmək üçün seçilmiş şəxs də erməni – iki dəfə məhkum olunmuş Eduard Qriqoryan idi. Baxmayaraq ki, Sumqayıt hadisələrinin təşkilatçısı kimi azərbaycanlı Əhməd Əhmədov güllələnib, amma şahid ifadələri əsl günahkarın əslində erməni əsilli Qriqoryan olduğunu sübut edir.

Sumqayıt faciəsi zamanı yüzlərlə azərbaycanlı ailəsinin öz həyatlarını təhlükə qarşısında qoyaraq, erməni qonşularını qəzəblənmiş kütlənin təhlükəsindən xilas etmələri haqqında da çoxlu məlumatlar, şahid ifadələri var.

Yaxın tarixdə baş vermiş bu hadisələrin mahiyyəti ermənilərə də çox yaxşı məlumdur. Amma istənilən hadisədən özlərini məzlum xalq, soyqırıma məruz qalan kimi dünyaya tanıtmağa çalışan ermənilər Sumqayıt hadisələrindən də öz çirkin maraqları üçün istifadə etməyə çalışırlar. İllərdir Türkiyəyə qarşı qondarma “erməni” soyqırımı iddiaları ilə çıxış edən ermənilər Sumqayıt da özlərinin törətdikləri hadisələrə də “genosia” donu geyindirməyə çalışırlar.

Burda başqa bir məqam isə dünyaya “DQR” adlı bir “qurumun” olduğunu sübut etməkdir. Guya ATƏT-də bəyanatın “DQR XİN”in təşəbbüsü ilə “DQR” “parlamenti” adından yayılması iddiaları da bunu göstərir. Bununla Azərbaycanın işğal edilmiş ərazisində yaradılmış və heç bir ölkə tərəfindən tanınmayan separatçı bir qurumun mövcudluğunu gündəmə gətirməyə çalışırlar.

"Ermənistan nümayəndəliyi ATƏT-in tribunasından sui-istifadə edir"

Azərbaycanın Xarici İşlər Nazirliyi(XİN) də bu addımı ermənilərin növbəti təxribatı adlandırıb. XİN-in mətbuat xidmətinin rəhbəri Hikmət Hacıyev 1news.az-a bildiib ki,  Sumqayıt hadisələri ilə bağlı Azərbaycanın  Baş Prokurorluğu və Xarici İşlər Nazirliyi birgə bəyanatla çıxış edib və Sumqayıt hadislərinin əsil mahiyyəti, bunun məqsədyönlü şəkildə SSRİ DTX-sı  və Ermənistan xüsusi xidmət orqanları tərəfindən təxribat kimi təşkil olunması barəsində də geniş ictimaiyyətə məlumat verilib:

“Məsələnin digər tərəfinə gəlincə, burda qondarma rejimin heç bir səlahiyyəti yoxdur. Yəni həmin separatçı rejim hər hansı bir beynəlxalq tribunadan nəsə səsləndirə bilməz.  Sadəcə Ermənistanın ATƏT yanında daimi nümayəndəliyi tərəfindən bu kimi tamamilə əsassız və təxribat xarakterli materiallar yayılır ki, bunların da heç bir əssı yoxdur”.

H.Hacıyev əlavə edib ki, Azərbaycanın qeyd edilən bəyanatı ATƏT daxil olmaqla, bütün beynəlxalq təşkilatlarda yayılıb:

“Ermənstan tərəfi bununla guya cavab verməyə çalışır. Amma Baş Prokurorluq və XİN-in bəyanatı  ATƏT daxil olmaqla, bütün beynəlxlq təşkilatlarda yayıldı.  Beynəlxalq ictimaiyyətin diqqətinə təkzibolunmaz faktlarla bir daha çatdırıldı ki, Sumqayıt hadisələrinin arxasında nə dayanır. Ermənistan bu gün Sumqayıt hadisələrindən ucuz bir təbliğat məqsədilə istifadə etməyə çalışır, amma ortaya heç bir fakt qoya bilmir. Çünki hər hansı faktdan danışmağa əsasları yoxdur. Amma Azərbaycan tərəfindən bu hadisələrin məqsədyönlü təxribat olmasına dair istintaq materialları, təkzibolunmz və əsaslı faktlar bir daha beynəlxalq ictimaiyyətə çatdırıldı”.

H.Hacıyev vurğulayıb ki, “Dağlıq Qarabağ”  “XİN”i  adlı anlayış yoxdur:

“Azərbaycanın işğal olunmuş ərazilərində Ermənistan tərəfindən yaradılmış qanunsuz, qondarma rejim var. Bu da işğal, təcavüz və qanlı etnik təmizləmə nəticəsində Ermənistn tərəfinin öz cinayətlərini gizlətmək üçün yaradılıb”.

XİN rəsmisi hesab edir ki, Ermənistanın ATƏT yanında daimi nümayəndəliyi öz səlahiyyətlərini pozur və ATƏT-in tribunasından sui -istifadə edərək bu kimi yalançı, dezinformasiya xarakterli materialları yaymağa çalışır: “Amma yerindəcə Azərbaycanın ATƏT yanında nümayəndəliyi onların layiqli cavabları verir. Hər halda qondarma rejim adından guya belə bir bəyanatın yayılması Ermənistan mediasının təqdim etdiyi materialdır və təxribat xarakteri daşıyır”.

P.Sultanova

OXUCULARIN SEÇİMİ
REDAKSİYANIN SEÇİMİ
Siyasət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2018 "The First News" İnformasiya Agentliyi,,
Bütün hüquqlar qorunur
entonee.net