Hikmət Hacıyev: Azərbaycan Türkiyənin terror təhdidinə qarşı əsaslı təhlükəsizlik narahatlıqlarını tam şəkildə anlayır
Azərbaycan terrorizmdən əziyyət çəkmiş dövlət kimi, terrorizmin bütün forma və təzahürlərini qəti şəkildə pisləyir və terrorizmə qarşı mübarizədə beynəlxalq ictimaiyyətin səylərini dəstəkləyir.
1news.az-a XİN-in mətbuat xidmətindən verilən xəbərə görə, bunu qurumun mətbuat xidmətinin rəhbəri Hikmət Hacıyev bildirib:
“Beynəlxalq və regional sülh və təhlükəsizliyin təmin edilməsi üçün terror təhlükəsinin kökünün kəsilməsi xüsusilə vacibdir. Türkiyə hökuməti tərəfindən bəyan edildiyi kimi, Türkiyə Silahlı Qüvvələri tərəfindən həyata keçirilən “Zeytun budağı” əməliyyatının məqsədi Türkiyənin sərhədlərinin təhlükəsizliyini təmin etmək, bölgədəki terror təhlükəsini zərərsizləşdirilmək və ərazidə yaşayan mülki insanları terror hücumları və təhdidlərindən qorunmaq məqsədi daşıyır.
Türkiyə dəfələrlə terror hücumlarına məruz qalıb və nəticədə çoxsaylı günahsız insanlar həlak olub. Azərbaycan Türkiyənin terror təhdidinə qarşı əsaslı təhlükəsizlik narahatlıqlarını tam şəkildə anlayır.
Biz qardaş Türkiyə və Türkiyə xalqının bir daha heç zaman xain terror hücumlarına məruz qalmamasını arzu edir və diləyirik”.
Xatırladaq ki, yanvarın 20-də saat 17:00-da Türkiyə Suriyada PYD/PKK terror qruplaşmalarının məhv edilməsi istiqamətində “Zeytun budağı” əməliyyatına başlayıb. Türk Ordusu terrorçuların 113 obyektindən 103-nə zərbə endirib.
Türkiyə Afrində genişmiqyaslı əməliyyatlara başlayıb
Türkiyə region ölkələrinin səfirlərini Afrindəki əməliyyat barədə məlumatlandıracaq
S.Xankişiyeva
