Ekspert: Növbəti ilə ötən 9 aydan daha yüksək nəticələrlə qədəm qoyacağıq
“Keçən il əldə olunan stabillik bu il iqtisadiyyatda bir az da möhkəmlənib və artım meylləri, eyni zamanda müsbət tendensiyalar inkişaf edib. Bunu ötən 9 ayda sosial-iqtisadi inkişafın yekun göstəriciləri də sübut edir”.
Bu barədə 1news.az-a iqtisadçı ekspert Pərviz Heydərov Azərbaycan Prezidenti İlham Əliyevin sədrliyi ilə Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında səsləndirilən fikirlərə, açıqlanan göstəricilərə münasibət bildirərkən deyib.
O vurğulayıb ki, ötən 9 ayda ümumi daxili məhsul 0,8 % artıb, qeyri-neft sektorunda artım 1 %, sənaye istehsalı 2 , qeyri-neft sənayesi isə 10,8 % yüksəlib. Kənd təsərrüfatında irəliləyiş isə daha diqqətəlayiqdir:
“Belə ki, 9 ayda 4,3 % artım böyük nəticədir. İnflyasiya aşağıdır. Cəmi 2,6 %... Ümumiyyətlə, xatırladım ki, 2017-ci ili bütövlükdə 0,1% göstəriciylə başa vurmuşduq. Keçən il əvvəlcədən də iqtisadiyyatda bərpa ili olaraq proqnoz edilmişdi. Belə ki, sözügedən ildə ardıcıl olaraq 2 ildir davam edən geriləmə prosesinin dayanacağı və stabilləşmə müşahidə olunmağa başlayacağı qeyd edilmişdi ki, bu da, hökumətin 2016-cı ilin əvvəlindən həyata keçirməyə başladığı tədbirlər, yəni, iqtisadiyyatı idarəetmə sistemini təkmilləşdirməsi ilə yanaşı, bütün istiqamətlər üzrə qənaətə keçməklə mövcud büdcə-vergi siyasətini dəyişdirməsi, o cümlədən, pul-kredit siyasətini daha da sərtləşdirməsi, həmçinin xarici iqtisadi faktorların təsirlərinin də həmin ilin ikinci yarısından yumşalmağa başlaması, xüsusən də neftin qiymətinin hasilatçı ölkələr tərəfdən istehsalın azaldılacağıyla bağlı söhbətlər ortaya çıxan gündən sabitləşməsi ilə əlaqəli idi”.
Ekspert deyib ki, 2016-cı ildə 3,1% azalmadan sonra 2017-ci ildə 0,1% artımın qeydə alınması, bu il üçün ən azı neftin dünya bazar qiymətlərinin sabit qalacağıyla əlaqədar daha yüksək nəticə əldə olunacağını vəd edirdi:
“Bundan əlavə, ölkənin qeyri-neft sektorunda inkişafın davam etməsi də çox şey iddia edir. Hökumətin qeyri-neft məhsullarının ixracının getdikcə genişləndirilməsi istiqamətindəki tədbirləri dayandırılmayıb. 2018-ci ildə qeyri-neft sektorunda 2,9%, növbəti illərdə isə orta hesabla 3%-dən yuxarı artım proqnozlaşdırılıb ki, hökumət qarşıdakı illərə də inamla baxır. Hesab edirəm ki, ilin sonunadək də müsbət göstəricilər inkişaf etməkdə davam edəcək və növbəti ilə ötən 9 aydan da daha yüksək nəticələr ilə qədəm qoyacağıq”.
1news.az
