Dünyanın ən çirkli çayı təmizlənəcək

İndoneziyanın paytaxtı Cakarta şəhərinin hakimiyyət orqanları Çitarum çayının suyunu 2025-ci ilədək təmizləmək barədə qərar qəbul edib.

1news.az-ın AZƏRTAC-a istinadən verdiyi xəbərə görə, Dünya Bankının rəyinə əsasən, Çitarum dünyanın ən natəmiz su hövzəsidir. Aparılan araşdırmaların nəticələrinə görə, bu çayda toksik maddələrin miqdarı çox yüksəkdir və ilin müxtəlif vaxtlarında onun suyunun tərkibinin dəyişməsinə baxmayaraq, heç bir standarta cavab vermir. Yaranmış fövqəladə vəziyyət Cakartanın hakimiyyət orqanlarını 300 kilometr uzunluğu olan bu çayı yenidən təmizləməyə cəhd göstərməyə məcbur edib.

Ötən əsrin 80-ci illərində Cakartada sənaye zonası yaradılması nəticəsində çayın sahili boyunca 200-dən çox tekstil fabriki tikilib. Bu fabriklər hər gün su hövzəsinə 280 tona yaxın sənaye tullantısı atır. Bundan əlavə yerli sakinlər məişət tullantılarını da çaya tökürlər.

Belə ciddi təhlükəyə baxmayaraq, çayın suyundan suvarmaq, yuyunmaq və hətta içmək üçün 30 milyona yaxın indoneziyalı istifadə edir.

İndoneziya dəniz işləri naziri Coko Xartoyo bildirib ki, çayı təmizləmək üçün sahildə yerləşən müəssisələr ciddi nəzarətə götürüləcək və tullantıların ləğvi qaydalarına əməl etməyən fabriklər bağlanacaq. Bu məqsədlə çayın kənarında videokameraların quraşdırılması nəzərdə tutulur.

Nazirin sözlərinə görə, çayı təmizləmək üçün xüsusi qurğulardan istifadə olunacaq. Görüləcək tədbirlər nəticəsində çayın suyunun 50-60 il əvvəl olduğu kimi təmizlənəcəyinə ümid bəslədiklərini qeyd edən C.Xartoyo, lazımi tədbirlərin tam ciddiliyi ilə həyata keçiriləcəyini bildirib.

1news.az