Dehlidə Hindistan-Azərbaycan hökumətlərarası komissiyanın iclası keçirilir
Dehlidə Hindistan-Azərbaycan ticarət, iqtisadi, elmi və texnoloji əməkdaşlıq üzrə hökumətlərarası komissiyanın 5-ci iclası keçirilir.
1news.az-a Hindistanın ölkəmizdəki səfirliyindən verilən məlumata görə, iclasda ekologiya və təbii sərvətlər naziri Muxtar Babayevin rəhbərliyi ilə Azərbaycan nümayəndə heyəti iştirak edir.
Oktyabrın 12-də yekunlaşacq iclasda Hindistan tərəfdən ticarət və sənaye naziri cənab Suresh Prabhu həmsədrlik edəir.
Tərəflərin geniş sahələrdə, o cümlədən ticarət, investisiya, nəqliyyat və yük daşınması, energetika, karbohidrogen, kiçik və orta müəssisələr, kənd təsərrüfatı və heyvandarlıq məhsulları, ərzaq təhlükəsizliyi, ərtaf mühitin mühafizəsi, turizm, mədəniyyət, səhiyyə, əczaçılıq, kosmos və uzaqdan hiss etmə sahələrində ikitərəfli əməkdaşlıq əlaqələrini müzakirə etmələri gözlənilir.
Onlar həmçinin, Hindistanın qərb limanlarını İran limanları vasitəsilə Azərbaycan və Rusiya ilə birləşdirəcək Beynəlxalq Şimal-Cənub Nəqliyyat Dəhlizinin (BŞCND) inkişaf etdirilməsi üzrə əməkdaşlığı da müzakirə edəcəklər. Təklif olunan BŞCND marşrutu mövcud dəniz marşrutundan daha ucuz və qısa olacaqdır.
Hindistanla Azərbaycan arasında sıx dostluq əlaqələri mövcuddur. Hindistan Azərbaycanın müstəqilliyini tanıyan və diplomatik əlaqələr quran ilk ölkələrdəndir. Hindistan və Azərbaycan arasında ikitərəfli ticarət getdikcə artır. Hindistanın ONGC Videsh şirkəti Azəri-Çıraq-Günəşli neft yatağında və Bakı-Tbilisi-Ceyhan (BTC) kəmərində paya malikdir.
P.Sultanova
