Çingiz Qənizadə: Ermənistanda hadisələrin bu sonluqla nəticələnməsi hakimiyyətin xalqdan çox uzaq olması ilə bağlıdır
Ermənistanda Serj Sarkisyanın hakimiyyətdən getməsi tələbi ilə keçirilən kütləvi etiraz aksiyalarının iştirakçılarının sayının gündən-günə artması hadisələrin bu sonluqla nəticələnəcəyini açıq-aydın göstərirdi. Ermənistanda narazı xalq yeni prezident Armen Sarkisyanı və köhnə prezident Serj Sarkisyanı qəbul etmir, bu ölkədə kəskin siyasi hakimiyyət böhranı yaranıb.
1news.az xəbər verir ki, bu fikirləri AZƏRTAC-a açıqlamasında Milli Məclisin deputatı Çingiz Qənizadə deyib.
Çingiz Qənizadə bildirib ki, Ermənistanda ona görə hadisələr qısa zaman kəsiyində bu sonluqla nəticələndi ki, bu ölkədə hakimiyyət xalqdan çox uzaq idi. Xalqla hakimiyyətin heç bir əlaqəsi yox idi. Ermənistanın cinayətkar rejimi Dağlıq Qarabağ kartı üzərində hakimiyyətə gəlmişdi və bu kartdan öz hakimiyyətini möhkəmləndirmək üçün istifadə edirdi. Xalqdan uzaq, mənbəyi xalq olmayan bir hakimiyyətin sonu da belə olmalı idi.
Milli Məclisin deputatı qeyd edib ki, Ermənistanda siyasi böhranın hələ nə qədər davam edəcəyini söyləmək çətindir. Bu ölkədə klanlararası qarşıdurma daha da gərginləşəcək. Serj Sarkisyanın ardınca digər istefalar da olacaq. Onsuz da inkişafdan əsər-əlamət qalmayan, tənəzzül, aclıq və səfalətin hökm sürdüyü, iqtisadiyyatı dağıdılmış, sabitliyi pozulmuş Ermənistanın hələ uzun müddət özünə gələ bilməyəcəyi aydındır. Ermənistandan fərli olaraq Azərbaycanda isə seçkilərin nəticələri ilə bağlı narazılıq yaranmadı, Prezident İlham Əliyev böyük səs üstünlüyü ilə daha yeddi il hakimiyyətdə qalmaq şansı əldə edərək yeni hökumət formalaşdırdı. Bu gün Azərbaycanda xarici siyasi qüvvələrin təhriki ilə küçələrə axışmağa, rəngli inqilablar etməyə maraqlı olan narazı kütlə yoxdur. Ermənistanda isə küçəyə axışıb inqilab edənlər demokratiya yox, sadəcə, insan kimi yaşamaq, ailələrini dolandırmaq, ac qalmamaq haqqını tələb edirlər. Bu gün Azərbaycan bölgənin və postsovet məkanının sabitlik adasıdır və bu sabitliyin əsası iqtidar–xalq birliyidir.
1news.az