Bədii gimnastika yığmasının baş məşqçisi maşınla “Bravo”ya girib – FOTO
Ötən gün Bakıda baş verən qeyri-adi qəzanı törədən sürücünün kimliyi məlum olub.
1news.az-ın Baku.ws-ə istinadla verdiyi xəbərə görə, ötən gün "Koroğlu”da yerləşən "Bravo” hipermarketinə girən "Audi-Q3”ün sürücüsü xanım olub.
Həmin sürücü Azərbaycanın bədii gimnastika yığmasının baş məşqçisi Mariana Vasilyevadır.
Hadisə ilə bağlı Azərbaycan Gimnastika Federasiyası ilə əlaqə saxladıq. Qurumun mətbuat katibi Bikə Abdullayeva açıqlamasında bildirdi ki, hadisə zamanı Mariana Vasilyeva heç bir xəsarət almayıb.
"Mariana Vasilyeva xəsarət almayıb, salamatçılıqdır. Hazırda o, iş başındadır. Avtomobilə nə qədər ziyan dəyməsi barədə isə heç bir məlumatım yoxdur”, - deyə Bikə Abdullayeva bildirib.
Qeyd edək ki, ötən gün "Audi-Q3” markalı avtomobil "Koroğlu”da yerləşən "Bravo” hipermarketində girib. Qəzadan sonra həmin maşının dövlət nömrə nişanı çıxarılıb.
S.Xankişiyeva
