Bakıda Polşanın müstəqillik günü qeyd olunub
Bakıda Polşanın dövlət müstəqilliyinin bərpa edilməsinin 100 illiyi qeyd edilib.
1news.az xəbər verir ki, Polşanın Azərbaycandakı səfirliyinin təşkilatçılığı ilə Müslüm Maqomayev adına Azərbaycan Dövlət Akademik Filarmoniyasında bayram konserti olub.
Tədbirdə rəsmi şəxslər, millət vəkilləri, səfirlər, ictimaiyyət nümayəndələri iştirak ediblər.
Hər iki ölkənin dövlət himnləri səsləndirildikdən sonra çıxış edən Polşanın ölkəmizdəki səfiri Marek Tsalka ölkəsinin müstəqilliyinin tarixindən, keçdiyi yoldan söz açıb.
Xarici işlər nazirinin müavini Mahmud Məmməd-Quliyev Azərbaycan hökuməti adından Polşa xalqını təbrik edib. Bildirib ki, bu il hər iki ölkə, həm Azərbaycan, həm də Polşa müstəqillik əldə etmələrinin 100-cü ildönümünü qeyd edirlər:
“Bizim müasir diplomatik əlaqələrimizin tarixi 25 ili əhatə etsə də, xalqlarımız arasında əsrdən artıq dır ki, əlaqələr formalaşıb. Polşa Azərbaycan üçün yaxın dost dövlətdir və ölkələrimiz arasında münasibətlər yüksək səviyyədədir. Polşa həm də Azərbaycanın da iştirakçısı olduğu Avropa İttifaqının Şərq Tərəfdaşlığı proqramının təşəbbüskarlarından biridir”.
Nazir müavini Polşa xalqına sülh və firavanlıq arzulayıb.
Sonra tanınmış Polşa pianoçusu, Şopen mükafatı laureatı Yeva Poblotskanın solistliyi ilə Frederik Şopenin əsərlərindən ibarət konsert olub.
P.Sultanova
