Bakıda Azərbaycan-Hindistan biznes forumu keçirilib - FOTO
Hindistanın Ticarət və Sənaye Palatasının təşəbbüsü ilə Bakıda Azərbaycan-Hindistan biznes forumu keçirilib.
1news.az xəbər verir ki, biznes forumda çıxış edən Hindistanın Azərbaycandakı səfiri Sanjay Rana deyib ki, iki ölkə arasında biznes əlaqələri yüksək səviyyədə inkişaf etməkdədir. Bu əlaqələrin inkişafı Azərbaycan və Hindistan hökumətlərinin prioritetləri arasındadır. Diplomat vurğulayıb ki, bu gün Bakıda Hindistan məhsullarının sərgisi də açılıb. Orada 95-ə yaxın şirkət təmsil olunur. Sərgidə şirkətlərin müxtəlif məhsulları təqdim edilir.
Ekologiya və təbii sərvətlər nazirinin müavini Firdovsi Əliyev vurğulayıb ki, iki ölkənin surətli inkişafı əməkdaşlığı genişləndirməyə imkan verir. Bu biznes dialoqun uğurlu nəticələrə gətirib çıxaracağına əminik. Onun sözlərinə görə, hökumətlərarası komissiyanın fəaliyyəti də əlaqələrin inkişafında müsbət rol oynayır. İkitərəfli ticarət dövriyyəsi də artmaqdadır. Ötən il bu göstərici 463 milyon dollar təşkil edib. O deyib ki, iki ölkə turizm, əczaçılıq və bir sıra digər sahədə əməkdaşlığa maraq göstərir.
Nazir müavini vurğulayıb ki, Azərbaycanla Hindistan arasında çarter və birbaşa reyslərin açılması üçün danışıqlar aparılır.
AZPROMO-nun sədri Rüfət Məmmədov bildirib ki, iki ölkə arasında sıx ticarət münasibətləri var. Hindistan Azərbaycanın 15 əsas ticarət tərəfdaşlarından biridir. Ölkədə 15-dən çox Hindistan şirkəti fəaliyyət göstərir.
R.Məmmədov vurğulayıb ki, Azərbaycanda Hindistan iş adamlarının fəaliyyəti üçün çox yaxşı şərait var.
Hindistanın PHD Ticarət və Sənaye Palatasının komitə rəhbəri Purshottam Bhaqeria deyib ki, Azərbaycan və Hindistan arasında yaxın dostluq münasibətləri var. Hazırda əməkdaşlıq üçün hədsiz imkanlar mövcuddur.
Sonda Hindistan-Azərbaycan biznes forumu çərçivəsində PHD Ticarət və Sənaye Palatası (CCİ) və Azərbaycan İxracın və İnvestisiyalarının Təşviqi Fondu (AZPROMO), eləcə də PHD Ticarət və Sənaye Palatası və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) arasında ayrılıqda Anlaşma Memorandumu imzalanıb.
Pərvanə Sultanova