1news.az

Bakıda Abidə Menecerləri Forumu keçirilir

27 İyun saat 10:25 ~ 2 dəqiqəlik oxu 217
Bakıda Abidə Menecerləri Forumu keçirilir

26 iyun – 4 iyul tarixlərində Bakıda YUNESKO-nun Dünya İrs Komitəsinin 43-cü sessiyası çərçivəsində Abidə Menecerləri Forumu keçiriləcək.

1news.az xəbər verir ki, beynəlxalq tədbirə Dünya İrs Komitəsinin 43-cü sessiyasının tərkib hissəsi kimi, Azərbaycan Respublikasının Mədəniyyət Nazirliyi, YUNESKO-nun Dünya İrsi Mərkəzi, Mədəni mülkiyyətin mühafizəsi və bərpasının öyrənilməsi üzrə beynəlxalq mərkəz (ICCROM), "İçərişəhər" Dövlət Tarix-Memarlıq Qoruğu İdarəsi və Mədəni İrsin Qorunması, İnkişafı Və Bərpası Üzrə Dövlət Xidməti ilə birgə ev sahibliyi edir.

1972 Dünya İrs Konvensiyasına uyğun olaraq Dünya İrsi Siyahısına 276 milyon hektardan çox ərazini əhatə edən 1000-dən çox abidə daxildir. Dünya İrsi Mülkiyyətinin daha səmərəli qorunmasına nail olmaq üçün Dünya İrsi Abidə Menecerləri Forumu böyük önəm daşıyır. Bu forum yeni təşəbbüs kimi 2017-ci ildə Polşanın Krakov şəhərində başlayıb və artıq 3-cü dəfə keçirilir.

8 gün ərzində davam edəcək forumda 50-dən çox ölkəni təmsil edən 70-ə yaxın  şəxsin iştirakı gözlənilir. Abidə menecerləri bu tədbir günləri ərzində bir sıra iclaslarda və yığıncaqlarda iştirak edəcəklər.

Forumun açılış mərasimi bu gün Bakı Konqres Mərkəzində baş tutub. Mərasimdə mədəniyyət naziri Əbülfəs Qarayev, Ümumdünya İrs Mərkəzinin direktoru Mextild Rossler, "İçərişəhər" Dövlət Tarix-Memarlıq Qoruğunun rəisi Əsgər Ələkbərov və Mədəni mülkiyyətin mühafizəsi və bərpasının öyrənilməsi üzrə beynəlxalq mərkəzin (İCCROM) baş direktoru Uebber Ndoro açılış nitqi ilə çıxış edərək irsin qlobal anlamından bəhs edib, eləcə də Abidə Menecerləri Forumunun yeni biliklərin əldə edilməsi, əlaqələrin qurulması və təcrübənin qazanılması nöqteyi-nəzərdən önəmindən danışıblar.

Forumun gündəliyinə aşağıdakı mövzular daxildir: Abidə Menecerləri Forumunun Dünya İrsi çərçivəsində və Potensial Yaradılması sahəsində məqsəd və obyektləri; Dünya İrsi və Dayanıqlı İnkişaf – 2015-ci il idarəetmə sənədi ilə tanışlıq; Mədəniyyət mənzərələri və Dünya İrsinin xüsusiyyətləri nəzdindəki konservativ tətbiqlərə dair əsas təqdimat və s.

Bundan əlavə forum iştirakçıları "İçərişəhər" Dövlət Tarix-Memarlıq Qoruğunu, “Qobustan” Dövlət Tarixi-Bədii Qoruğunu  və digər yerləri ziyarət edəcəklər. 

2 iyul 2019-cu il tarixində iştirakçılar Dünya İrs Komitəsinin 43-cü sessiyasında xüsusi bəyanat ilə çıxış edəcəklər.

1news.az

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2019 "The First News" İnformasiya Agentliyi,,
Bütün hüquqlar qorunur
entonee.net