Azərbaycanın UNICEF-lə tərəfdaşlığına və uşaqlara həsr olunmuş poçt markası nəşr edilib
Birləşmiş Millətlər Təşkilatının Uşaq Fondu (UNICEF) Azərbaycan hökuməti ilə tərəfdaşlığının 25 illiyinə həsr olunmuş xatirə poçt markası nəşr edilib.
1news.az-ın məlumatına görə, Nəqliyyat, Rabitə və Yüksək Texnologiyalar Nazirliyinin nəzdində fəaliyyət göstərən “Azərmarka” MMC-nin direktoru Leyla Güləliyevanın və UNICEF-in Azərbaycandakı Nümayəndəliyinin rəhbəri Edvard Karvardinin iştirakı ilə marka imzalanaraq möhürlənib.
Mərasimdə E.Karvardin bildirib ki, UNICEF Azərbaycandakı fəaliyyətinin dörddə bir əsrini qeyd etməkdən qürur duyur:
“Azərbaycan iqtisadi və sosial baxımdan sürətlə inkişaf etdiyi üçün UNICEF bütün uşaqların eyni imkanlara, eyni şanslara malik olması və onların hüquqlarına eyni hörmətlə yanaşılması ideologiyasına sadiq olaraq qalır. UNICEF-in Azərbaycandakı hər bir uşaq naminə ötən 25 ildəki fəaliyyət və tərəfdaşlığını qeyd etmək üçün hökumətin bu hədiyyəsini qəbul etməkdən xoşbəxtlik duyuruq”.
Qeyd olunub ki, bu poçt markasında çətir altında dayanan bir uşaq silueti əks olunub. Onun əlindən tutan böyük insan əli isə dünyadakı hər bir uşaq üçün qayğı və müdafiənin vacibliyini xarakterizə edir. Məhdud sayda olan xüsusi buraxılış markalarını poçt şöbə və filiallarından, eləcə də, “Şəbəkə” xidmət mərkəzlərindən əldə etmək mümkündür.
Nəzərinizə çatdıraq ki, Azərbaycan 1992-ci ildə dünyada Uşaq Hüquqları haqqında Konvensiyanı ratifikasiya edən ilk ölkələrdəndir. UNICEF-in ilk ölkə proqramının əsası isə 1993-cü ildə qoyulub.
Ötən müddət ərzində UNICEF hökumət, vətəndaş cəmiyyəti və yerli icmalarla birgə işləməklə Azərbaycandakı uşaq və qadınlar naminə ciddi irəliləyişə töhfə verib. Bu fəaliyyətlər arasında Azərbaycanın poliomielit xəstəliyindən azad ölkəyə çevrilməsinə kömək edilməsi və digər qarşısı alına bilən xəstəliklərin yayılmasının azaldılması, inkişaf ləngiməsi kimi halları azaltmaq üçün bütün ölkədə duzun yodlaşdırılmasının tətbiqi, ibtidai məktəbdə iştirak səviyyəsinin 90%-dən yuxarı çatdırılması, beşyaşlı uşaqlar üçün məktəbə ilkin hazırlıq proqramının tətbiqi və dövlət uşaq müəssisələrində yaşayan uşaqların sayının yarıya endirilməsi kimi məsələləri qeyd etmək olar.
Məlumat üçün bildirək ki, UNICEF həyata keçirdiyi bütün fəaliyyətlərdə hər bir uşağın hüquqlarını və rifahını dəstəkləyir. Biz bu öhdəliyi praktik olaraq həyata keçirmək üçün tərəfdaşlarımızla birlikdə 190 ölkədə və ərazidə fəaliyyət göstəririk və bu fəaliyyətimiz zamanı hər yerdə bütün uşaqların maraqları naminə diqqət mərkəzimizdə ən həssas və təcrid olunmuş vəziyyətdə olan uşaqların əhatə olunmasına xüsusi səy göstərilməsi dayanır.
1news.az
