Azərbaycan səfiri Azərbaycan-İsveçrə Birgə Komissiyasının həmsədri ilə görüşüb – FOTO
Azərbaycanın İsveçrə Konfederasiyasındakı səfiri Xanım İbrahimova Azərbaycan Respublikası Hökuməti ilə İsveçrə Federal Şurası arasında ticarət və iqtisadi əməkdaşlıq üzrə Birgə Komissiyanın həmsədri Ervin Bollinqer ilə görüşüb.
1news.az-a Səfirlikdən verilən xəbərə görə, görüşdə iki ölkə arasında münasibətlərinin daha da inkişafından, qarşılıqlı yüksək səviyyəli səfərlərdən məmnunluq ifadə olunub.
Səfir digər sahələrlə yanaşı iqtisadi və ticari əlaqələrin daha da artırılması istiqamətində də işlərin davam etdirildiyini, Azərbaycandan İsveçrəyə iqtisadi heyətin səfər etməsinin nəzərdə tutulduğunu bildirib.
Görüşdə, həmçinin müxtəlif sahələrdə əməkdaşlığın inkişafı, müqavilə-hüquq bazasının artırılması, iki ölkə arasındakı ticarət dövriyyəsinin daha da yüksəlməsinə səylərin göstərilməsi, birgə hökumətlərarası komissiyanın 28 iyun tarixində keçiriləcək növbəti iclasına hazırlıq işləri, qarşılıqlı səfərlərin həyata keçirilməsi istiqamətində də müzakirələr aparılıb.
Ervin Bollinqer Azərbaycanla əlaqələrin daha da inkişafında maraqlı olduğunu və bu istiqamətdə birgə Hökumətlərarası Komissiyasının da öz səylərini daha da artırdığını vurğulayıb.
Son illərdə iki ölkənin iqtisadiyönümlü təşkilatları arasında əməkdaşlıq əlaqələri inkişaf edir. Gələn həftə Azərbaycan Kiçik və Orta Biznesin İnkişafı Agentliyi (KOBİA) ilə İsveçrənin Kiçik və Orta Miqyaslı Müəssisələr Cəmiyyəti, Azərbaycanda İxracın və İnvestisiyaların Təşviqi Fondu (AZPROMO) ilə Turqau Kantonunun Ticarət və Sənaye Palatası arasında əməkdaşlıq haqqında memorandumların imzalanması nəzərdə tutulur. Bu barədə razılıq səfirliyin İsveçrə kantonlarına həyata keçirdiyi işgüzar səfərlər zamanı əldə edilib. 27 iyun tarixində isə Sürixdə İsveçrə-MDB Birgə Ticarət Palatası ilə birgə biznes forumun təşkili də nəzərdə tutulan tədbirlər arasındadır. Oktyabrda isə Qərbi İsveçrənin işgüzar dairələrindən ibarət nümayəndə heyətinin Azərbaycana səfəri gözlənilir.
S.Xankişiyeva
