Azad Rəhimov: “Qran-Prini yüksək səviyyədə keçirməyə davam edəcəyik”
“Qran-Pri yarışı gözlədiyimiz kimi yüksək səviyyədə keçdi. Hər şey əvvəlcədən müəyyən olunmuş qrafiklə həyata keçirildi.
1news.az-ın məlumatına görə, bunu Azərbaycan gənclər və idman naziri Azad Rəhimov Bakıda ardıcıl ikinci dəfə “Formula-1” üzrə keçirilən Qran-pri turnirini dəyərləndirərkən deyib.
Nazirin sözlərinə görə, bu dəfə Azərbaycan Qran-Prisi adlanan yarış yüksək təşkilatçılığı ilə fərqlənib:
“Birinci Avropa Qran-Prisi ilə müqayisədə bu il turist sayında 25-30 faizə qədər artım qeydə alındı. Demək olar ki, bütün biletlər satılıb. Bununla bağlı rəsmi rəqəmlər yaxın günlərdə mətbuata açıqlanacaq. Bu da bizim böyük uğurumuzdur.
Sözsüz ki, belə bir yarışda maraqlı məqamlar olmalıdır. Onlardan biri odu ki, hazırda tvitterdəki haştaqlara görə AzerbaijanGP dünyada birinci yerdədir. Bakı isə 4-cüdür.
Azərbaycanın ABŞ-dakı səfiri ilə əlaqə saxladım. İndiyədək Azərbaycanla bağlı bir dənə də olsun məlumat belə yazmayan NBC kanalı 3 saat paytaxtımızdan, təşkil etdiyimiz yarışdan danışıb. Növbəti illərdə də Formula-1 üzrə Qran-Prini yüksək səviyyədə keçirməyə davam edəcəyik”.
Qeyd edək ki, Azərbaycan Qran-prisini qalibi Daniel Rikkardo (“Red Bull”) olub.
Babək Cahandarov
