Avinyan: Yeni AES-in tikintisi üçün Rusiya ilə danışıqlar aparır
Ermənistan hökuməti Rusiya tərəfinin bu ölkədə yeni AES-in tikintisində iştirakı ilə bağlı danışıqlar aparır.
1news.az RİA Novosti-yə istinadla xəbər verir ki, bunu Ermənistanın baş nazirinin müavini Tiqran Avinyan deyib.
O bildirib ki, Ermənistanın enerji sistemi üç sütun üzərində qurulub - nüvə enerjisi, istilik enerjisi və hidroenerji. Avinyanın sözlərinə görə, bütün üç mənbə demək olar ki, enerji istehsalını bərabər şəkildə paylayır:
“Bu kontekstdə, Ermənistan nüvə enerjisindən imtina etməyə hazırlaşmır. Biz hazırda “Metsamor” AES-in bağlanmasından sonra yeni bir nüvə elektrik stansiyası inşa etmək imkanını nəzərdən keçiririk. Ermənistan tərəfi artıq rusiyalı tərəfdaşlarla bu məsələni müzakirə edir”.
Qeyd edək ki, “Metsamor” AES-i 1980-ci ildə istismara verilib. İstismar müddətini çoxdan başa vurmuş bu stansiya region üçün ciddi təhlükə mənbəyinə çevirilib.
P.Sultanova
