AŞPA İrəvana ciddi təzyiqlər göstərsəydi, Zəhra, Fariz, Aygün bu gün aramızda olardı

Azərbaycanın AŞPA-dakı nümayəndə heyətinin üzvü Qənirə Paşayeva qurumun qış sessiyası çərçivəsində keçirilən  Azad Demokratlar Qrupu toplantısında Ermənistan silahlı qüvvələrinin amansızlıqla qətlə yetirdiyi balaca Zəhradan, Fariz və Aygündən, işğal etdiyi Azərbaycan torpaqlarında qətlə yetirdiyi uşaqlardan danışıb.

1news.az xəbər verir ki, millət vəkili Ermənistanın uşaqlara qarşı bu cinayətləri neçə illərdir davam etdirdiyini , bu cinayətləri törədənlərin ədalət qarşısında cavab vermədiklərini vurğulayıb:

“Bu da onu göstərir ki bu cinayətlər Ermənistan rəhbərliyi tərəfindən dəstəklənir. Əgər AŞPA 2005-ci ildə qəbul etdiyi və Ermənistanın artıq 13 ildir yerinə yetirməkdən imtina etdiyi 1416 saylı qətnamənin yerinə yetirilməsi istiqmətində rəsmi İrəvana ciddi təzyiqlər göstərsəydi, Zəhra, Fariz, Aygün kimi uşaqlar bu gün aramızda olardu. Ona görə də AŞPA sadəcə qərarlar qəbul etməklə işini bitmiş hesab etməməlidir, həmin qətnamələrin yerinə yetirilməsi istiqamətində təsir və təzyiq mexanizmlərindən də istifadə etməlidir. Və AŞPA bundan sonra da ön cəbhə bölgələrində uşaqların həyatını itirməsini istəmirsə, o zaman qəbul etdiyi sənədlərin yerinə yetirilməsi istiqamətində Ermənistana təzyiqlər etməlidir. Eyni zamanda bu kiçik yaşlı uşaqları qətlə yetirən cinayətkarlar, uşaq qatilləri ədalət qarşısında cavab verməlidir. Və onların ədalər qarşısında cavab verməsinə nail olunması üçün AŞPA səylərini artırmalıdır”.

Q.Paşayeva qeyd edib ki,  insan haqlarının müdafiəsi dəyərləri üzərində qurulmiş bu təşkilatdan həmin uşaqların ailəsi məhz bunu gözləyir: “Sadəcə onlar deyil, AŞPA-da hökm sürən ikili standartlar üzündən təşkilata etimadı, inamı azalan bütün azərbaycanlılar da. Azad Demokratlar Qrupunu da fəaliyyətində bu məsələlərə diqqət ayırmağa çağırıram”.

P.Sultanova