1news.az

“ASAN xidmət”lə İSESKO arasında Anlaşma Memorandumu imzalanıb – FOTO

11 Noyabr saat 12:37 ~ 1 dəqiqəlik oxu 206
“ASAN xidmət”lə İSESKO arasında Anlaşma Memorandumu imzalanıb – FOTO

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin  (“ASAN xidmət”) nümayəndə heyətinin Mərakeş Krallığına səfəri davam edir.

Səfər çərçivəsində noyabrın 10-da Dövlət Agentliyinin sədri İnam Kərimov İslam Təhsil, Elm və Mədəniyyət Təşkilatının (İSESKO) baş direktoru Əbdüləziz bin Osman əl-Tuveycri ilə görüşüb.

1news.az-a Agentlikdən verilən xəbərə görə, görüşdə tərəflər Azərbaycan brendi kimi tanınan “ASAN xidmət” modeli və bu qabaqcıl təcrübənin İSESKO-nun üzv dövlətlərində tətbiqi məsələləri, dövlət xidmətlərinin göstərilməsində innovasiyalardan faydalanma, XXI əsrdə dövlət xidmətlərinin göstərilməsi sahəsində rastlaşılan çağırışlar barədə fikir mübadiləsi aparıblar.

Agentliyin sədri Azərbaycan Prezidenti İlham Əliyev tərəfindən son illər həyata keçirilən islahatlar və bu islahatların tərkib hissəsi olan “ASAN xidmət”in fəaliyyətindən bəhs edib. Həmçinin o, Dövlət Agentliyinin son illərdəki yenilikləri və uğurlu layihələri, o cümlədən tabeliyində yaradılmış “ABAD” mərkəzlərinin fəaliyyəti barədə İSESKO baş direktorunu məlumatlandırıb.

Görüşdən sonra Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə İslam Təhsil, Elm və Mədəniyyət Təşkilatı arasında Anlaşma Memorandumu imzalanıb.

Anlaşma Memorandumunun imzalanmasında məqsəd Dövlət Agentliyi və İSESKO arasında mövcud ikitərəfli əməkdaşlığı daha da gücləndirmək, İSESKO-ya üzv ölkələrdə dövlət xidmətlərinin göstərilməsi sahəsini daha da təkmilləşdirmək üçün “ASAN xidmət” modelinin tətbiqi üzrə əməkdaşlığı təşviq etdirməkdir.

Görüşdə Azərbaycanın Mərakeş Krallığındakı səfiri Tarik Əliyev və Azərbaycan İnnovasiyaların İxracı Konsorsiumunun (Azinnex) üzvləri də iştirak ediblər.

S.Xankişiyeva

 

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2017 "The First News" İnformasiya Agentliyi,,
Bütün hüquqlar qorunur
entonee.net