1news.az

ABŞ-ın paytaxtında 20 Yanvar faciəsi anılıb – FOTO

20 Yanvar saat 10:54 ~ 2 dəqiqəlik oxu 87
ABŞ-ın paytaxtında 20 Yanvar faciəsi anılıb – FOTO

Vaşinqtonda 20 Yanvar faciəsinin 28-ci ildönümü ilə əlaqədar anım mərasimi keçirilib.

1news.az-ın verdiyi xəbərə görə, Azərbaycanın ABŞ-dakı Səfirliyində baş tutan tədbirdə Vaşinqton şəhərində və ətraf ərazilərdə yaşayan soydaşlarımız və yerli ictimaiyyətin nümayəndələri iştirak edib.

Mərasimdə Azərbaycanın ABŞ-dakı səfiri Elin Süleymanov çıxış edərək 20 Yanvar qanlı hadisəsi zamanı əliyalın mülki əhaliyə Sovet ordusunun silah tətbiq etdiyini, xalqımızın çoxsaylı oğul və qızlarının şəhid olduğunu, bu tarixin xalqımızın yaddaşında bir faciə kimi əks olunduğunu söyləyib.

Eyni zamanda səfir bu faciənin xalqımızın müstəqillik əzmini daha da möhkəmləndirdiyini və milli, mənəvi dirçəlişimiz baxımından əhəmiyyətini vurğulamışdır. Bu xüsusda, E.Süleymanov Ümummilli lider Heydər Əliyevin Vətənimiz üçün həmin taleyüklü günlərdə göstərdiyi sarsılmaz iradə və əzmkarlığını misal gətirmiş, onun Moskvada mətbuat konfransı keçirərək Azərbaycan xalqına və dünya ölkələrinə səsləndirdiyi müraciətinin soydaşlarımıza verdiyi mənəvi dəstək olduğunu, habelə Azərbaycan xalqının müstəqillik yolunda qərarlı olmasının göstəricisi kimi qiymətləndirmişdir. Səfir vurğulamışdır ki, hər il hüznlə qeyd edilən 20 Yanvar faciəsi eyni zamanda ölkəmizin müstəqilliyinin böyük qurbanlar bahasına əldə edildiyini xatırladır və bunun daha da möhkəmləndirilməsi uğrunda bütün soydaşlarımızın sıx birləşməsi və birgə səylərinin vacibliyini göstərir.

Daha sonra mərasimdə iştirak edən digər şəxslər də öz fikirləri ilə bölüşmüşdür. Azərbaycanın ABŞ-dakı icmasının fəal üzvü Həbib Azərsina 20 Yanvar faciəsinin hər bir soydaşımız üçün kədər günü olduğunu qeyd etmiş, həmin bu  qanlı hadisənin təfərrüatlarının dünya ictimaiyyətinə çatdırılmasında ABŞ-dakı soydaşlarımızın gördüyü işləri xatırlatmışdır. O, bu qanlı hadisənin milli oyanışımız və həmrəyliyimiz yolunda mühüm amil olduğunu vurğulayıb.

Sonda 20 Yanvar şəhidlərinin əziz xatirəsi yad edilmiş və onların ruhuna ehsan verilib.

S.Xankişiyeva

 

OXUCULARIN SEÇİMİ
REDAKSİYANIN SEÇİMİ
Siyasət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2018 "The First News" İnformasiya Agentliyi,,
Bütün hüquqlar qorunur
entonee.net