“VA-LİQA” ənənəvi yapon musiqisi qrupu Bakıya gəlir

Yaponiyanın Azərbaycandakı səfirliyinin təşəbbüsü ilə Bakıda   “VA-LİQA” yapon ənənəvi musiqi qrupunun konserti olacaq.

1news.az Yaponiyanın ölkəmizdəki səfirliyinə istinadla xəbər verir ki, musiqi qrupu tsuqaru samisen (simli musiqi aləti), şinobue (nəfəs aləti), vadaiko (zərb aləti) və şişimai (şir rəqsi) ifaçılarından ibarətdir.

 “VA-LİQA” 28-29 iyun tarixlərində Şəki və Bakıda çıxış edəcək. Ənənəvi yapon musiqisini dinləmək və yapon mədəniyyəti ilə tanış olmaq üçün gözəl bir şans olduğu üçün hər kəs konsertə dəvətlidir. Konsertə giriş sərbəst və ödənişsiz.

İyunun 28-də musiqi qrupu Şəki şəhəri “İpək Yolu” 8-ci Beynəlxalq Musiqi Festivalında, iyunun 29-da isə Bakıdakı Heydər Əliyev parkı, Yapon bağının qarşısında çıxış edəcək (Həzi Aslanov metro stansiyasının yaxınlığında).

Konsertdə Azərbaycan milli musiqisi (tar, kamança, nağara) və muğam ifaçıları ilə sintez musiqiləri də ifa olunacaq.

Pərvanə Sultanova