Paşinyan təlaş içində: Hərbi-siyasi vəziyyət olduqca gərgindir
Hərbi-siyasi vəziyyət olduqca gərgindir. Mən sadəcə atəşkəs rejimi pozuntularını nəzərdə tutmuram, onların sayı çox deyil, hərbi personalın dediklərini bildirirəm.
1news.az xəbər verir ki, bunu Ermənistanın baş naziri Nikol Pashinyan öz “Facebook” səhifəsində bəyan edib.
Onun sözlərinə görə, bu cür pozuntular çox olduğu halda, hökumət başçısı seçildikdən sonra 3-4 hadisə olub: "Ancaq hər halda hərbi-siyasi vəziyyət olduqca gərgindir. Mənim göstərişim bundan ibarətdir: biz son dərəcə həssas və istənilən təxribata hazır olmalıyıq".
Qeyd edək ki, dünən səhər saatlarında Azərbaycan-Ermənistan dövlət sərhədinin Qazax rayonu istiqamətində düşmənin kəşfiyyat-diversiya qrupu qoşunların təmas xəttini keçməyə cəhd göstərib.
Müdafiə Nazirliyinin məlumatına görə, bölmələrimizin sayıqlığı nəticəsində düşmənin təxribat cəhdinin qarşısı alınıb və itkilər verərək geri çəkilməyə məcbur edilən qrupun bir üzvü əsir götürülüb.
Özünün bildirdiyinə görə o, 1984-cü il təvəllüdlü Karen Kazaryandır.
Hadisə zamanı Azərbaycan Ordusunun bölmələri itki verməyib.
P.Sultanova