Dneprdə Azərbaycanla parkı və Mədəniyyət Mərkəzinin açılması müzakirə edilib
Azərbaycanın tanınmış şirkətləri Dnepr şəhərinin iri layihələrinə investisiya qoymağa hazırdır.
1news.az-ın AZƏRTAC-a istinadən verdiyi xəbərə görə, bu fikri Dnepr şəhər Administrasiyasının rəhbəri Boris Filatovla görüşü zamanı Azərbaycanın Ukraynadakı səfiri Azər Xudiyev deyib.
Azər Xudiyev bildirib ki, Azərbaycan şəhərləri ilə Ukraynanın Dnepr şəhəri arasında iqtisadi, sosial layihələrin reallaşdırılması üçün birgə işlər həyata keçirilməlidir. Azərbaycanın qapıları Ukrayna sərmayəçilərinin üzünə açıqdır.
Dnepr şəhərində yaşayan azərbaycanlıların şəhərin ictimai, siyasi, iqtisadi layihələrində fəal olduqlarını deyən Boris Filatov bildirib ki, Administrasiya rəhbərliyi Azərbaycan şirkətlərinə investisiya qoyuluşuna hər cür kömək göstərməyə hazırdır.
Dnepr şəhər meri, həmçinin ötən əsrin əvvəllərində - 1905-ci ildə inşa olunan qədim türk məscidinin yenidən bərpasına Azərbaycan şirkətlərini dəvət edib.
“Bundan başqa, Dneprin mərkəzində Azərbaycan parkının açılmasına və orada ölkəmizin tanınmış simalarından birinin heykəlinin ucaldılmasına, Azərbaycan Mədəniyyət Mərkəzinin açılmasına hər cür dəstək göstərə bilərik”, - deyə mer əlavə edib.
Səfir irəli sürülən təkliflərə baxılacağını və layihələrin reallaşmasına kömək göstəriləcəyini qeyd edib.
1news.az