KPMG və Sberbank “KazanSummit-2017” sammiti çərçivəsində partnyorluq maliyyələşdirməsi ilə bağlı işgüzar səhər yeməyi təşkil ediblər – FOTO

Mayın 19-da Kazan şəhərində keçirilən “Rusiya - İslam dünyası: KazanSummit-2017” sammiti çərçivəsində Sberbank və KPMG “Partnyorluq maliyyələşdirməsi: #yenireallıq” mövzusunda səhər yeməyi təşkil ediblər.

Səhər yeməyinin moderatorları qismində KPMG Rusiya və MDB ölkələri üzrə Maliyyə Xidmətləri Praktikasının rəhbəri, KPMG Azərbaycan şirkətinin İdarəedici Partnyoru Vüqar Əliyev və “Sberbank” SC-nin İdarə Heyətinin sədr müavinin məşvərətçisi Behnam Qurbanzadə çıxış ediblər. İşgüzar səhər yeməyi Rusiya və MDB ölkələrində partnyorluq maliyyələşdirməsinin perspektivlərinin və onun inkişafına təkan verən amillərin müzakirəsinə həsr edilib.

Sessiya zamanı Tatarıstan Respublikasının prezidenti Rüstəm Minnixanov, Beynəlxalq İslam Biznesi Assosiasiyasının prezidenti Marat Kabayev, Sberbank-ın İdarə Heyətinin sədr müavini Oleq Qaneyev, Dubay İslam İqtisadiyyatının İnkişafı Mərkəzinin baş məsləhətçisi Xalid Əl-Canahi, AAOIFI İslam Maliyyə Təşkilatları üzrə Mühasibatlıq Uçotu və Audit Təşkilatının baş direktoru Hamed Həsən Əl-Merah, Rusiya Bankının İdarə Heyətinin məşvərətçisi Aleksey Simanovskiy, Rusiya Dövlət Dumasının 6-cı və 7-ci çağırışının deputatı və Dövlət Dumasının Təhlükəsizlik və Korrupsiyaya qarşı Mübarizə Komitəsi sədrinin birinci müavini Dmitri Savalyev çıxış ediblər.

Hazırda geosiyasi və maliyyə sahəsində müşahidə edilən mürəkkəb vəziyyətlə, habelə maliyyə təşkilatlarına inamın azalması ilə əlaqədar olaraq, partnyorluq maliyyələşdirməsinə maraq artmaqdadır. Rusiyada və MDB ölkələrində partnyorluq maliyyələşdirməsinin tətbiqi məsələsi uzunmüddətli vəsait axtarışında olan ənənəvi bankların da marağına səbəb olur. Bununla belə, müştəri seqmentinin formalaşmasına baxmayaraq, bu sahə mövcud qanunvericilik çərçivəsində tam inkişaf edə bilmir. Maliyyə sektorunun yeni reallığına çevrilən partnyorluq maliyyələşdirməsinin tətbiqi üçün bank sistemində müəyyən dəyişikliklər və zəruri inkişaf şəraitlərinin yaradılması tələb olunur. İşgüzar səhər yeməyinin məqsədi də məhz bu dəyişikliklərin, onlarla bağlı olan mövcud ilkin şərtlərin və bu sahədə Rusiya və MDB ölkələrində gələcək vəziyyətin müzakirəsindən ibarət olub.

Tədbir zamanı spikerlər qeyd edilən mövzunun bütün aspektlərini işıqlandırıb: partnyorluq maliyyələşdirməsinin tətbiqində beynəlxalq təcrübə, bu sahədə Rusiyada cari vəziyyət (Sberbank işçi qrupunun fəaliyyəti, Tatarıstan Beynəlxalq İnvestisiya şirkətinin təsis edilməsi, dövlət-özəl sektor əməkdaşlığı layihələrində və ixracın təşviqi layihələrində partnyorluq maliyyələşdirməsi) və partnyorluq maliyyələşdirməsi məhsulları üzərində qanunvericilik nəzarəti məsələləri.

Tədbir müxtəlif biznes seqmentlərində partnyorluq maliyyələşdirməsinin inkişaf perspektivlərinin müzakirəsi və sual-cavab sessiyası ilə başa çatıb.

Reklam hüququnda