Bolqarıstan klubu azərbaycanlı futbolçunu bəyənməyib
Bolqarıstanın "Slaviya" klubu azərbaycanlı futbolçu Mirkamil Həşimlini bəyənməyib.
1news.az “Report”a istinadən xəbər verir ki, bu barədə komandanın baş məşqçisi Vladimir İvanov "gong.bg" saytına açıqlamasında bildirib.
O, 21 yaşlı yarımmüdafiəçini Türkiyənin Antalya bölgəsində Qazaxıstan "İrtış"ına 3:1 hesabı ilə qalib gəldikləri yoxlama matçında sınaqdan çıxardıqdan sonra belə qənaətə gəlib. Həşimliyə bir hissə şans verən İvanov gənc oyunçunun bolqarıstanlı həmyaşıdlarından müsbət mənada fərqlənmədiyini söyləyib: "Mirkamil pis oyunçu deyil. Amma elə öz futbolçularımız səviyyəsindədir. Bizim siyasətimiz ondan ibarətdir ki, əsas komandada öz məktəbimizdən yetişmiş futbolçulara daha çox yer verək".
Qeyd edək ki, Mirkamil Həşimli 2006-cı ildə Türkiyənin U-15 Liqasında "Fənərbağça" klubunun formasını geyinib. Amma "Qalatasaray"la oyunda sol ayağından zədə alan yarımmüdafiəçi Azərbaycana qayıtmalı olub. Ötən mövsümü "Rəvan"da keçirmiş Həşimli hazırda klubsuzdur.
1news.az
