Daniel Seqoviya: Qol vurmaq üçün 100 faiz hazır olmaq vacib deyil

“Neftçi”nin hücumçusu Daniel Seqoviya klubun rəsmi saytına müsahibə verib.

1news.az həmin müsahibəni təqdim edir:

- Yeni komandaya, ab-havaya uyğunlaşa bilmisiz?

- Ab-havaya artıq tam uyğunlaşmışam. "Neftçi”də məni hər şey qane edir. Komanda yoldaşlarım məni isti qarşıladı, buna görə onlara minnətdaram. Rəhbərlik və məşqçilər heyəti məni gözəl başa düşür. Qalır yalnız qol vurub azarkeşləri sevindirmək.

- Özünüzü qarşıdakı oyunlara hazır hesab edirsizmi?

- Təbii ki, bir müddət komandasız məşq etdiyimi nəzərə alsaq, vəziyyətim elə də ideal deyil. Amma formamı itirməmişəm. Fikrimcə, optimal forma yığmaq üçün mənə daha 5-6 gün vaxt lazım olacaq.

- Bəs ilk qol üçün necə?

- Qol vurmaq üçün 100 faiz hazır olmaq vacib deyil. Sadəcə, lazımi vaxtda lazımi yerdə olmaq kifayətdi.

- Əsas heyət uğrunda Uqo Barqasla mübarizə aparacaqsız. Amma görünür rəqabət sizin münasibətinizə pis təsir göstərmir...

- Bütün komanda yoldaşlarımla, eləcə də Uqo ilə münasibətim yaxşıdı. Əgər o, daim qol vursa, mən buna yalnız şad olaram. Əsas odu ki, komanda qələbə qazansın. Əlbəttə, mən də "Neftçi” üçün faydalı olmaq istəyirəm və hesab edirəm ki, Uqo ilə rəqabətimizin bütün komandaya xeyri dəyəcək. Kim daha yaxşı olsa, o da oynayacaq.

1news.az